- Naqitatigut, radiukkut tv-kkut paasititsiniaanerit ukiut marluk affaatalu ingerlanerani suliarineqarsimasut taakku takusinnaavakka. Kisianni nalornissuteqartoqartoq paasinarpoq, taamaattumik taanna aallaavigalugu paasissutissanik itinerusunik suliaqarpugut, naalakkersuisoq oqarpoq.Assi: Merete Lindstrøm KNR

Soraarnerussutisiaqalernissamut aaqqissuussaq pillugu paasissutissiinerusinnaagaluartik naalakkersuisoq nassueruteqarpoq

Akileraartarnermut aqutsisoqarfimmi uippakajaarlutik ulappupput. Akileraartarnermut allagartat kukkunillit, inatsisit nutaat atuutilersinneqartussat, innuttaasorpassuillu ernumasut ikiorneqarnissaminnik pisariaqartitsisut. Taamaakkaluartoq Naalakkersuisoq eqqissisaavoq.

Soraarnerussutisiamut inatsisip nutaap atuutilerneranut tunngatillugu suleriuserineqarsimaneranut SIK ilaatigut aamma isornartorsiueqataavoq.

- takorloorsinnaanngilara ulluinnarni qanoq inuuniassanersut

 akileraarutaat taama annertutigisoq,  taamaattumik isumaqarpunga arlaatigut  pinngitsoorani aaqqiisoqartariaqartoq, SIK-p siulittaasuat Jess G. Berthelsen taama oqarpoq.

Innuttaasut 6628-it soraarnerussutisiaqalernissamut aaqqissuussamik pilersitsinikuunatillu aaqqissuussamik akiliinikuunngillat, taakku ilagaat alisartoq 34-inik ukiulik Arqalo Inûsugtoq.

Suliaq naatsumik

- Innuttaasut 6.828-t soraarnerusutisiaqarnissamut aaqqissuussinermut peqataasussaatitaanermut akiliisarsimanngillat. Taamammat Akileraartarnermut Aqutsisoqarfik aningaasanik amigaataasunik akiliisitsiniarpoq.

- Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniagassammata taakku ukioq manna akileraaruteqarnerusariaqarput.

- Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.

- Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.

- Isumaqarpunga siusinnerusukkut ilisimatitsissutaareersimasinnaagaluartoq, tassanngaannarpallaanngitsumik, Arqalo Inûsugtoq taama oqarpoq.

Arlallit isornartorsiuisut

Soraarnerussutisiaqalernissamut aaqqissuussinermut peqataasussaatitaaneq 2018 atuutilerpoq. Aalisartup 34-nik ukiullip akileraarnerulernissani takugamiuk aatsaat inatsisaasoq paasivaa .

- Naluara pimooruppallaarsimannginnerlugu, kisianni soorunami qaammatit tamaasa katersaqarpunga. Tamanna piareersimaffiginikuunnginnakku qanoq annertutigisumik katersaqarnissara nakkutiginngitsoornikuuara, Arqalo Inûsugtoq oqarpoq.

Taamaammat soraarnerussutisiaqarnissamut aaqqissuussap ersarinnerusumik nittarsaanneqarsimasinnaagaluartoq taanna isumaqarpoq.

- Iluamik eqaannerusumik ersarinnerusumillu nassuiarneqarsimasinnaagaluarpoq, Arqalo Inûsugtoq oqarpoq.

Inatsit nutaaq Grønlandsbankenimit siornatigut isornartorsiorneqaqqaarnikuuvoq, paasissutissat annikippallaarsorineqarlutik. Sulisitsisut isornartorsiuisunut sapaatip akunnerata siuliani ilannguppoq.

AAMMA ATUARUK Soraarnerussutisiaqalernissamut piumasaqaatit pillugit ajornartorsiutit amerlanerusut

Paasissutissanik amigaateqarnerarlugu isornartorsiuisut, aningaasaqarnermut naalakkersuisumit, Vittus Qujaukitsumit paasilluarneqarsinnaapput.

- Naqitatigut, radiukkut tv-kkut paasititsiniaanerit ukiut marluk affaatalu ingerlanerani suliarineqarsimasut taakku takusinnaavakka. Kisianni nalornissuteqartoqartoq paasinarpoq, taamaattumik taanna aallaavigalugu paasissutissanik itinerusunik suliaqarpugut.

SIK-mi ilaasortat amerlasuut eqqugaasut

SIK-mut ilaasortanut 8000-init amerlanerulaartunut siulittaasoq aaqqissuussap siunertaanut akerliunngilaq, kisianni taassuma ilaasortaasa amerlanerpaartaat aningaasaqarnikkut oqimaa qatigiissaariniarnermigut ilungersuuteqarput.

- Maannakkullu ajoraluartumik sulisartorpassuit eqqugaapput, ilai 48 aamma 50 procentimik akiliisariaqalerlutik taassumalu saniatigut qaavatigut aamma 6 procentinik.

AAMMA ATUARUK Peqatigiiffiit: Soraarnerusutisiassanut ajornartorsiutaasoq arlaatigut iliuuseqarfigineqassaaq

Soraarnerussutisiaqalernissamut aaqqissuussinermut peqataasussaatitaaneq atuutilinnginnerani innuttaasut 15.000-init amerlanerusut katersaqarsimanngillat. Ullumikkullu 9.000-it missaat peqalersimasut Vittus Qujaukitsoq ilisimatitsivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat