Danskit ingerlatsiviata, e-Boksip qarasaasiatigut allakkanik nassitsisarneq ingerlatarissavaa, aaqqissuussinerlu taanna apriilip aallaqqaataani atuutilissaaq. Innuttaasut 15-ileereersimasut ulloq taanna aallarnerfigalugu allakkanik pinngitsuugassaanngitsunik qarasaasiatigut nassinneqartalissapput.Assi: e-Boks A/S

Soraarnerussutisiassanik katersinngitsoorneq: Allakkat tigusisussanut apuutinngitsut

Allakkat soraarnerussutisiassanik pinngitsoorani katersisussaatitaanermut paasissutissartallik katersisimanngitsunut anngussimanngillat. Qarasaasiatigut allagaqartarfik tassa Digital Post ajornartorsiutaasumut aaqqiissutaassaaq.

Innuttaasut 6000-init amerlanerusut soraarnerussutisiassanut malittarisassat pissutigalugit akileraarnerusussanngortinneqarput. Taakkunannga qassiiusut ukiumit nutaamit akileraartarnermut allagartassatik tigunnginneranni ajornartorsiutaasut pillugit paasissutissiiffigineqarsimanngissoripput.

Taamaattoqarsinnaasorlu aningaasaqarnermut naalakkersuisup, Vittus Qujaukitsup (NQ) nassuerutigaa:

AAMMA ATUARUK Soraarnerussutisiaqalernissamut piumasaqaatit pillugit ajornartorsiutit amerlanerusut

- Allagarpassuit innuttaasunut apuussimanngillat, tamannalu pissutigalugu innuttaasunut qanoq aningaasarsisimatiginerannik qanorlu akiligassaqartiginerannik paasissutissiiniarneq ajornakusoorsimasinnaalluni. Taamaammat tassani ajornartorsiuteqarpoq, Vittus Qujaukitsoq oqarpoq.

Nuuttut najukkallu allagartaa

Akileraartarnermut Aqutsisoqarfiup oqarnera naapertorlugu ukiumoortumik nalunaarutit siorna aggustimi novembarimilu nassiunneqarput. Innuttaasut soraarnerussutissanut katersat nalunaarsornerannik nalunaarummi kukkuniusinnaasunik aaqqiissuteqarnissamut sapaatinik-akunnernik sisamanik periarfissaqarput.

Suliaq naatsumik

- Innuttaasut 6.828-t soraarnerusutisiaqarnissamut aaqqissuussinermut peqataasussaatitaanermut akiliisarsimanngillat. Taamammat Akileraartarnermut Aqutsisoqarfik aningaasanik amigaataasunik akiliisitsiniarpoq.

- Tassa imaappoq innuttaasut 6.628-t inatsit malillugu soraarnerusutisiassanut nammineq katersisussaatitaanermut akiliiniagassammata taakku ukioq manna akileraaruteqarnerusariaqarput.

- Innuttaasut qanoq aningaasarsiaqartiginerat apeqqutaalluni 2 procentip 6 procentillu akornanni akileraarnerutinneqassapput.

- Soraarnerusutisiaqalernissamut aaqqissuussamut peqataasussaatitaaneq januaarip aallaqqaataat, 2018-imi atuutilerpoq, Namminersorlutik Oqartussalli Akileraartarnermut Aqutsisoqarfillu akileraarutip procentiata qaffanneratigut soraarnerussutisiassanut aatsaat ukioq manna akiliisitsipput.

Allakkalli nassiunneqartut tamarmik apuuffissaminnut anngussimanngillat. Tamanna innuttaasut nuunnerminnik nalunaaruteqarnissamik eqqaamannissimannginnerannik nutarterisimannginnerannilluunniit ilaatigut pissuteqartoq naalakkersuisup oqaatigaa.

Taamaammat paasissutissat eqqortut qulakkeernissaannut ajornartorsiut pillugu Tele-Post kommuninilu innuttaasunut sullissiviit aamma oqaloqatigineqarput.

AAMMA ATUARUK Soraarnerussutisiaqalernissamut aaqqissuussaq pillugu paasissutissiinerusinnaagaluartik naalakkersuisoq nassueruteqarpoq

Vittus Qujaukitsup allakkat maanngaannartarnerannut allamik aamma aaqqiissutissartaqalilersoq erseqqissaatigaa: Namminersorlutik Oqartussammi NemID atorlugu allakkanik qarasaasiatigut nassitsisalernissamik pilersaaruteqarput.

Danskit ingerlatsiviata, e-Boksip qarasaasiatigut allakkanik nassitsisarneq ingerlatarissavaa, aaqqissuussinerlu taanna apriilip aallaqqaataani atuutilissaaq. Innuttaasut 15-ileereersimasut ulloq taanna aallarnerfigalugu allakkanik pinngitsuugassaanngitsunik qarasaasiatigut nassinneqartalissapput.

- Taamaammat paasissutissanik innuttaasunut ajornaannerusumik apriilimiit tunniussisalernissarput neriuutigaara, inuilli ilaat suli maileqanngillat, Qujaukitsoq oqarpoq.

Paasissutissiinerlunneq katersat amigarnerannut aamma pissutaasoq

Allakkat innuttaasunut apuutinngitsut isornartorsiorneqarnerata saniatigut paasissutissiiniarnerit annikippallaarlutillu pitsaasimannginnerat aamma isornartorsiorneqarpoq.

Isornartorsiuineq taanna naalakkersuisup isumaqatigaa.

- Qaammarsaanermi paasissutissiinerit pitsaanerulersillugillu innuttaasunut tigussaasunngortittariaqarpagut. Isornartorsiorneqartoq nassuerutigaara.

Ilanngutassiaq naatsuliartaatigut nalunaaqutaq 10.38 nutarterneqarpoq. NemID allassimajunnaarluni Digital Post allassimalerpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat