Soraarnerussutisiassanut tamatta ileqqaartussaatitaalissaagut

Soraarnerussutisiallit amerliartorput sulisinnaasullu ikiliartorlutik. Nunani tamalaani tamanna nalaanneqarmat nunarput minitaanngilaq.

Taamaammat nutarterisoqarnissaa pisariaqarpoq atugarissaarneq akissaqartinneqassappat. Soraarnerussutisiaqartitsisarnerup iluani nutarterinissaq naalakkersuisut siunniuppaat, tamannalu siunissami soraarninngortarumaartussat malugissavaat.

- Siunnerfigaarput soraarnerussutisianut innuttaasut tamarmik ileqqaartussanngornissaat, aningaasaqarnermut naalakkersuisut Maliina Abelsen oqarpoq.

Soraarninngornissamut killigitinneqartot aamma isiginiarneqarpoq. Agguaqatigiisillugumi ukioqqortusiartorpugut.

- Isummerfigisariaqassavarput soraarnerussutisiaqalernissamut killigitinneqartoq 65-iniit qaffanneqassanersoq, Maliina Abelsen oqarpoq.

Nunatsinni soraarnerit 70-it missaat ukiumut Danmarkimut nuuttarput tassanilu nunatsinniit soraarnerussutisiatik pigiinnartarpaat. Savalimmiormiut soraarnerit amerlasuut aamma Danmarkimut nuuttarput. Savalimmiormiulli inatsiseqarput naalagaaffeqatigiinnerup iluani nunamut allamut nuunnermi Savalimmiunit soraarnerussutisiat nassarneqarsinnaannginnerannik imaqartumik.

- Imaassinnaavoq Savalimmiuni taamatut inatsiseqarnera isumassarsiorfigigipput aningaasat Kalaallit Nunaanniiginnarnissaat qulakkeerniarlugu, Maliina Abelsen oqarpoq.

Naalakkersuisut aamma maluginiarpaat siusinnaartumik soraarnerutisiallit nunatsinni amerliartupiloortut. Ukiut 15-it ingerlanerinnaanni siusinnaartumik soraarnerussutisiallit 52 procentimik amerlisimapput.

- Tamanna akuersaaginnarneqarsinnaanngilaq. Siusinaartumik soraarnerussutisiaqarsinnaalernermut malittarisassat allanngortariaqarput, siusinaartumik soraarnerutisiaqartussaaneq ataavartumik nalilersorneqarsinnaalersillugu. Nalilersorneqarsinnaasariaqarpoq siusinaartumik soraarnerussutisialik sulileqqinnissaminut piareersimanersoq, Maliina Abelsen oqarpoq.