Snow Festimut eqimattat 15-it piareeqqapput - allanillu peqataarusuttoqarpat suli inissaqarpoq
Illoqarfiup qeqqani pisoqarnerutinniarlugu Nuuk Snow Festival ukioq manna Katuap silataani pissasoq aaqqissuisut aalajangiuppaat. Nalinginnaasumik apummik ilusilersuinerit nuutoqqamiittaraluarput.
Snow Festi februaarip ulluisa 27-anniit marsip aappaa ilanngullugu pissaaq, ukioq mannalu Sila qulequtarineqarpoq.
Ukioq manna inissisimaffia allaanerunerata saniatigut imeruersaatinik nerisassanillu peqassaartaaq, Kommuneqarfik Sermersuumi borgmesterip Avaaraq Olsenip festivalimi taakkunannga tuniniaasussanik eqimattanik sisamanik makitsinikuuvoq.
- Meeqqat atuarfianeersut eqimattat marluk aammalu timersoqatigiiffinneersut eqimattat marluk borgmesterip Avaaraq Olsenip makinnikuuai, taakkulu nunatta avataanut angalanissaminnut oorinik katersillutik kaffinik kaaginillu tuniniaasuussapput, taama suliniummi aqutsisoq Lars Kruuse oqarpoq.
Food Festival arfininngornermi marsip aallaqqaataanni sapaammilu marsip aappaanni Snow Festivalimeeqataassapputtaaq.
Nunanit allanit eqimattat amerlanerusut
Nunatsinni ukiukkut pisoqarpallaarneq ajortoq Lars Kruuse isumaqarpoq, taamaattumik festivalip pitsaasumik sunniuteqarnissaa neriuutigaa, tassuunakkummi ukiuunerani takornarianik amerlanerusunik soqutiginnilersitsisinnaasoq isumaqarpoq. Nunanit tamalaanit eqimattanik festivalimi peqataasoqartalernissaa taakkulu suleqatiginissaat aaqqissuisut neriuutigaat.
- Neriuppugut aappaagu nunanit allaniit eqimattanik ilaasoqarumaartoq, nunanimi allani aput sikulu pillugit festivalertartut amerlasoorujussuupput, festivalertitsisartullu suleqatiginissaat takorluugaralugu arlallit attaveqarfiginikuuagut, Lars Kruuse oqarpoq.
Festivalimi unammillernartut
Silami festivalertitsinermi silap qanoq innera apeqqutaasarpoq, tamannalu apummik sikumillu suliaqarnermi unammilligassaqarsinnaasarpoq. 2023-imi Snow Festertoqarnerani 15-nik kiappoq, taamaattumillu aaqqissuisut ukioq manna aputinik ileqqaarisimapput.
- Massakkut aputeqanngingajallunilu suna tamarmi sermiuvoq, qujanartumillu aputinut ilioraavinnik pilersitsinikuugatta. Aputit issoqqaarissut 17-it sananissaannut aput 400 kubikmeteritut annertutigisut atussavagut, imaassinnaavoq piffissap ingerlanerani allannguisugut kisianni piffissap tamanna takutikkumaarpaa, Lars Kruuse oqarpoq.
Ulluni sisamani apummik ilusilersuisoqarnerani kajumissutsimik suleqataarusukkuit nittartakkakkut tassa snow.gl-ikkut aaqqissuisut attavigisinnaavatit.
