2017-imi toqutsisoqarsimaneranik paasiniaanerit politiinut nammakkiisut

Toqutsisoqarsimaneranik paasiniaanerit Nunatsinni politiinut aningaasatigut sulisunullu nammakkiivoq. Politimesterip, Bjørn Tegner Bayip, tamanna KNR-imut oqariartuutigaa.

- Toqutsisoqarsimaneranik paasiniaanerit arfineq pingasut suliaraagut, ilaallu suli suliaralugit. Tamannali isumaqanngilaq, toqutsisoqarsimasutut eqqartuussivinnut ingerlateqqinneqassasut. Taamaattoq toqutsisoqarsimasutut paasiniaaffigaagut, Bjørn Tegner Bay oqarpoq.

Taassuma oqaluttuaraa toqutsisoqarsimaneranik paasiniaanerni sapinngisamik amerlanerpaat paasiniaaqataasartut, susoqarsimanerami paasineqarnissaa pingaaruteqarluinnarmat. Tassalu toqutsisoqarsimasutut paasiniaanerit politiinut ilungersortitsisarput, aammalu toqusut timaannik misissuisartunik misissueqqissaartartunillu Danmarkimit tikisitsisariaqartarlutik. Tamakkulu akisupput.

AAMMA ATUARUK Borgmesteriusimasoq inatsisartunilu ilaasortaasimasoq inuarsimasutut pineqaatissinneqartoq

Toqutsisoqarsimaneranillu suliat aningaasaqarnermut kisimi artukkiineq ajorput.

- Aamma inuttut akeqartarput. Naak suliagut pikkoriffigigaluarigut naallu paasiniaasartut pikkorissuugaluartut toqutsisoqarsimaneranik suliat suleqatitsinnut inuttut sunniuteqartarput.

Toqutsisoqarsimaneranik suliat 2016-imi pingasuupput, ukiorli manna ikinnerpaamik marloriaammik amerlanerusussaarpasillutik. Toqutsinerit ukioq manna sooq taama amerleriartiginerannut suna pissutaanersoq oqaatigissallugu kisitsisit taama ikitsigisut tunngavigalugit ajornartoq politimesteri oqarpoq. Nalorninanngitsorli ataasiuvoq:

- Tassa toqutsinerit pingasuugunik, arfiniliugunik arfineq pingasuugunilluunniit taava toqutsinerit pingasunik, arfinilinnik arfineq pingasunillu amerlavallaarput. Inuiaqatigiinni 56.000-iusuni ukiut amerlanersaanni toqutsisoqartartussaanngikkaluarpoq, Bjørn Tegner Bay oqarpoq.

Taassuma erseqqissaatigaa ukioq suli naanngimmat kisitsisit allanngoratarsinnaasut.

AAMMA ATUARUK Ilulissat: Pasineqartup 17-inik ukiulimmik toqutsinini eqqaamasaqarfiginngikkaa

AAMMA ATUARUK Politiit toqusoqarnera toqutsisoqarneratut misissuiffigigaat