Ilulissat: Pasineqartup 17-inik ukiulimmik toqutsinini eqqaamasaqarfiginngikkaa
Nukappiaraq 17-inik ukiulik inissiami aggustusip 19-ianni ukioq manna ullaap tungaani niaqqumigut kapineqarpoq. Taanna Nuummi Dronning Ingridip napparsimmavissuanut timmisartuunneqaraluarpoq annaanneqarsinnaasimananili.
Inissiami angut 21-inik ukiulik tigusarineqarpoq. Taanna politiinit taamanili tigummineqarpoq inuusuttuaqqamik toqutsisimasutut pasineqarluni.
Ilulissani politiit nalunaarput suliap misissuiffigineqarnera naammassisoq.
Unnerluussisussaatitaasumut suliap ingerlateqqinnissaanut tigummineqartup sianissutsimigut misissorneqarnissaa maanna utaqqivarput, Sebastian Bech Ilulissani politiineersoq oqarpoq.
Eqqartuussisutigut suliassami eqqartuussivimmi pisuutinneqaruni qanoq pineqaatissinneqassanersoq sianissutsimigut misissorneqarnissaa aaliangiisuusussaavoq.
AAMMA ATUARUK 17-inik ukiullip kapitinnini toqqutigigaa
Sebastian Bech nalunaarpoq 21-nik ukiulik nassuiaasimasoq, arfininngornermi ullaap tungaani nukappiaqqap Nuummi napparsimmavimmi toquneranik kinguneqartumi, susoqarsimanersoq eqqaamanagu. Toqutsisimasutut pasineqarnerminut pisuunnginnerarpoq.
Politiit toqutsinissamut pissutaasimasinnaasumik nassaarsimanerlutik oqaatigerusunngikkallaraat, Sebastian Bech oqarpoq, nalunaarlunili 21-inik ukiullip saniatigut allanik pasinnittoqanngitsoq.