Illoqqortoormiuni skakkernermik festivalertoqarpoq Islandimiut peqatigalugit
Illoqqortoormiuni påskemi allanartumik sammisassaqartitsisoqarpoq. Ukiuni qulinngortuni ukiut tamaasa pisartunngorsimasoq, tassa skakkernermik festivaalertitsineq Islandimiut skakkertartut klubbiata Hrokurinip aaqqissuuppaa.
Sisamanngormat aaqqissuussineq aallartippoq, meeqqat inersimasullu pinnguaammik skakkimik misilittaatinneqarmata. Tallimanngornermilu 'ilumoorsaarnerullutik' skakkernermik unammersuarnerit aallartinneqarput, påskip aappaanilu naggataarnersiornertalimmik naammassitinneqassallutik, islandermiut kalaallillu kammalaatigiinnerat persuarsiuutigineqassalluni.
Aamma atuaruk Islandimiut skakkertartut Nuummi skakkertitsilersut
Islandermiut kalaallit nunaannut 13-nissaat skakkeriarlutik tikeraarput. 2003-miilli skakkernermik ilinniartitsinerit unannmmersuarnerillu aaqqissuuttarsimavaat, taakkuli tunumi illoqarfinni nunaqarfinnilu ingerlattarsimavaat. Maannamullu tikeraarnerit 40-rut aaqqissuuttarsimallugit.
Illoqarfinnilu tikeraarneqartartuni skakkimik soqutiginninneq illoqqortoormiuni annersaasimavoq, Kristjana G. Motzfeldt festivaali pillugu tusagassiuutinut nalunaarummini allappoq. Taamaattumik påskemi skakkertitsineq maanna illoqqortoormiuni ingerlanneqaqqippoq, meeqqanut inersimasunullu nuannaarutaaqaluni.
Skakkernermik aaqqissuussineq nammineq piumassutsiminnik suliniuteqartunit aaqqissuunneqarpoq, Kommuneqarfik Sermersoorlu pingaarnertut aningaasaliisuulluni, Norlandair aammalu Air Iceland aaqqissuussinermut tapeeqataasimapput.
Illoqqortootmiuni meeqqat skakkillaqqinnerupput
Islandimeersoq skakkertartoq Hrafn, Kalaallit Nunaanni Tulukkamik taaneqartartoq, illoqqortoormiuni meeqqat tamangajaasa skakkimik unammisaqattaarsimavai, kingornalu ima oqarpoq.
- Kalaallit nunaani illoqarfinnit allanit illoqqortoormiormiuaqqat pikkorissusaat assigineqanngillat. Nuanneqaaq maannaqqilluni kammalaatillu naapeqqillugit, aaqqissuisut allapput. Johnny Napatoq tulukkamut unammigami naligiipput, taamaasilluni ajugaalluni.
Klubbilu Hrokurin nittartakkamini ima allaaserisaqarpoq:
- Island Kalaallit Nunaat avannaarsuani nunaapput qanigisariit. Assigiinnik aqquteqarpugut. Islandermiuusugut iluatsitsinersaavugut naboqaratta nunarsuarmi tamani pitsaanersaasunik. Anguniagaraarput eqqaamasat, nuannaarneq, asanninnerup annertusinissaa kammagiinnerlu pilersissallugit. Kalaallit Nunaanni ukiorpassuarni sulinitsinnut kammalaatigut tamaasa tapersersuinerannut qujaffigaagut, tapersersuineq inussiarnisaarnerlu tuppallernaqaaq.
