Islandimiut skakkertartut Nuummi skakkertitsilersut
Hrókurinnimi ilaasortat atuarfiit, meeqqeriviit, meeqqanullu ingerlatsiviit allat pulaassavaat, ataatsimut skakkertitsisassallutik, Nuuk Centerimilu unammiuaartitsissallutik.
Hrókurinn Nunatsinni skakkernermik 2003-mili siuarsaavoq, Qaqortumi ukioq taanna nunanit tamalaanit peqataaffigineqartumik unammiuaartitsigami. Hrókurinnimeersut Nunatsinnut immaqa 40-riarlutik angalasareerput.
Nunatsinni meerarpassuit, inuusuttut, atuarfiit, meeqqat angerlarsimaffii, skakkimillu peqatigiiffiit skakkerutinik tunissuteqarfigineqartarput, soorlu aamma skakkimik ilitsersuutinik kalaallisut oqaasertalinnik Hrókurinn suliaqarsimasoq.
Skak atorlugu ikinngutigiinneq nukittorsarniaraat
Kalaallit Nunaata Islandillu akornanni ikinngutigiinnerup suleqatigiinnerullu nukittorsarlugulu annertusarneqarnissaa Hrókurinnip sulinermini siunertaraa.
Skakkimik pikialaartitsineq Ukaliusami ullumi ulloqeqqanut ammarneqassaaq, Islandip Nunatsinni generalkonsuulia Pétur Asgeirsson tassani aamma peqataassalluni.
Skakkimik arfininngornerup tungaanut taava tassa pikialaartitsisoqassaaq, sumiiffinni assigiinngitsuni skakkertitsisoqassalluni. Hrókurinnip skakkernermik pikialaartitsinera sukkasuumik, tassa speedchessimik, unammiuaartitsinermik naggaserneqassaaq, Nuuk Centerimi ualikkut nalunaaqutaq marlunut tamanna malinnaavigineqarsinnaassalluni.