Siusinaarluni pensionisiat pillugit allanngortoqarnissaa Siumut ilimagaat

Kalaallit 3.000-it pallillugit 2013-imi siusinaartumik pensionisiaqartuupput. Kisitsillu qaffasissoq Naalakkersuisut aaqqissuusseqqinnikkut appartikkusuppaat.

Aaqqissuusseqqinnissap siunertaa Inuit Ataqatigiit tunngaviusumik isumaqatigaat. Taamaakkaluartoq siunnersuut maannakkutut isikkoqartillugu amigaateqarnerarpaa.

- Allannguuteqarnissamut siunnersuummik saqqummiisoqaraangat piviusorpalaarnissaa pingaaruteqarpoq. Una siunnersuut ajunngitsumik siunertaqaraluarluni piviusorsiunngilaq. Piviusorsiunngitsunillu innuttaasunut neriorsuisinnaanngilagut, Inuit Ataqatigiit sinnerlugu inatsisartunut ilaasortaq Aaja Chemnitz Larsen oqarpoq.

Tamanna Siumut sinnerlugu inatsisartuni ilaasortap, Jess Svanep isumaqatiginngilaa.

 - Siusinaartumik sulisinnaajunnarniuteqalersimasumik imminut peqqissutut isigaluni sulilernikuusumik naapittagaqareerpugut. Taamaattumik taartuinnartut ajornaqqinnaartutullu isiginagu, pineqartut kommunillu ataatsimut iliuusissamik pilersaarusioqatigiinnikkut ingerlanneqarnissaa naatsorsuutigaarput, Jess Svane oqarpoq.

Isumaqatigiinngitsoqarpalussinnaagaluartorli, partiit tamarmik siusinaartumik pensionisiaqartarnemi aaqqissuusseqqittoqarnissaa isumaqataapput.


Sullissisut amerlineqarniarput

Innuttaasut amerlanerit pisortanit ikiorsiissutinik isumalluuteqaratik suliffeqarnissaat pilerinarsarniarlugu, Naalakkersuisut aamma aningaasatigut suliniuteqarniarput. Innuttaasut sulisinnaassuseqanngilluinnartut maannamut naleqqiullugu pitsaanerusunik atugassaqartinnissaat aaqqissuusseqqinnermi aamma siunertarineqarpoq.

Taamaakkaluartoq siusinaartumik pensiuunisiallit amerlassusaasa illoqarfinni mikinerni unammillernarsinnaavoq.

Taamaammat sullissisut amerlineqassasut pilersaarutigineqarpoq.

- Una inatsit akuerineqassappat kommunini sulisussat amerlineqassapput, aamma kommunini sulisut immikkut pikkorissarneqassapput, isumaginninnermut naalakkersuisoq Martha Lund Olsen oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat