Siunnersuut: Danskit naalakkersuisui nunatsinni politiinut iluaqusiilertut
Siunnersuut malillugu misissuisartussanik pilersitsinermut aningaasaliisoqassasoq danskit naalakkersuisuisa siunnersuutigaat. Politiini misissuisartussat meeqqanik atornerluinermut sulianik ataatsimut suliaqartassapput.
Meeqqat inuusuttullu kinguaassiutitigut atornerlunneqarsimasut pillugit politiit sulinerannut oqilisaataallunilu sunniuteqarluassaaq.
AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it
Videokkut killisiuisoqartassaaq, pinerluttoqarsimaneranik paasiniaasoqarluni suliassanillu isumaginnittoqartassalluni. Misissuisartuttaaq paasiniaaqqissaarnernut, projektinut, ilisimasanik avitseqatigiinnermut oqartussanillu suleqateqarnermut atorneqassasut allaqqavoq.
Isumaginninnermut naalakkersuisup Martha Abelsenip, danskillu isumaginnermut naalakkersuisuata Astrid Kragip inassutinut 16-inut tallimanngormat saqqummiussaannut misissuisartunik pilersitsinissaq ilaavoq.
Taassuma saniatigut danskit naalakkersuisuisa Kalaallit Nunaanni Savalimmiunilu politeeqarneq nukittorsarniarpaat.
Nutarsaaneq
Taamaaliornissaminni nutarteriniarput aningaasanillu immikkoortitsillutik. Illuutitik nutarterniarpaat, nutaanillu atortulersorlugit taamaaliornikkut politiitut sulineq toqqissisimanarningortikkusullugu.
Aningaasat qanoq amerlatigisut danskit naalakkersuisuisa immikkoortinniarneraat oqaatigineqanngilaq.
