Siunnersuisoqatigiit katitigaanerat Naalakkersuisut allanngortikkusukkaat

Inuit Pisinnaatitaaffiinut Kalaallit Nunaata Siunnersuisoqatigiivi pillugit inatsisissatut siunnersuut piareersarneqarpoq. Ilaatigut siunnersuisoqatigiinni ilaasortat 15-iusut 11-nut ikilisinniarneqarput.

Inatsisissatut siunnersuutip aamma imaraa Nalaakkersuisut siunnersuisoqatigiinni ilaasortanik, siulittaasoq ilanngullugu, toqqaasalernissaat.

Tamannarpiarlu tusarniaavigineqartunit arlalinnit ajornartorsiutitaqartutut oqaatigineqarpoq.

Sulisitsisut peqatigiiffiat, GE, tusarniaanermi akissutimini allappoq "arlaannaanulluunniit attuumannginnissaq sapinngisamik annertunerpaamik qulakkeerniarlugu ilaasortat kattuffinnit toqqarneqartariaqartut Naalakkersuisuniunngitsoq." Tamanna aamma siulittaasumik toqqaanermut atuuppoq, GE taama isumaqarpoq.

Isumalu taanna Inuit Pisinnaatitaaffiinut Kalaallit Nunaata Siunnersuisoqatigiivisa, Ilisimatusarfiup aamma Transparency International Greenlandip tusarniaanermi akissutaanni taperserneqarpoq.

AAMMA ATUARUK Inuit pisinnaatitaaffii pillugit Siunnersuisoqatigiit nutaamik siulittaasortaartut

Siunnersuisoqatigiinni toqqaannartumik ilaasortat pingasuussapput: Meeqqat Illersuisuat, Inunnut Innarluutilinnut illersuisoq Nalagiissitaanermullu siunnersuisoqatigiinni siulittaasoq.

Sullissiviit kattuffiillu siunnersuisoqatigiinni ilaasortaatitaqarunaartussat ilagaat ICC, Ilisimatusarfik aamma Transparency International Greenland.

Siunnersuisoqatigiit allattoqarfimmik namminneq pilersitsillutillu ingerlatsissapput. Siunnersuisoqatigiilli missingersuutaat ilaqqinneqassanngillat, tusarniaavigineqartullu tamanna qularnartoqartippaat.

Inatsisissatut siunnersuut juulli sioqqullugu tusarniaassutigineqarpoq tusarniaanermi akissuteqarnissamut decembarip ulluisa aqqarngat killigitinneqarluni. Inuit Pisinnaatitaaffiinut Kalaallit Nunaata Siunnersuisoqatigiivi ukiuni tallimani atuutereerput ukiumullu 900.000 koruunit missaannik Nunatta karsianit aningaasaliiffigineqartarlutik.