Siunnersuisoqatigiit inuit pisinnaatitaaffii pillugit iluatsilluartumik oqallitsitsisut
![](/sites/default/files/styles/image_934x467/public/2023-11/DIHR_18.jpg?itok=fFlgoQqV)
Inuit Pisinnaatitaaffii pillugit Siunnersuisoqatigiit inuit pisinnaatitaaffiisa sammineqarnissaat siunertaralugu pisinnaatitaaffiit pillugit apeqqutit oqaluuserisassat, saqqummiineq filmilu pillugit nunatta kitaatungaanut angalavoq.
Siunnersuisoqatigiit Ilulissani, Sisimiuni, Aasianni Nuummilu suleqatigiissuteqartitsipput, angalanermillu inerniliineq ersarippoq.
Sunniuteqarpoq. Inuit Pisinnaatitaaffii pillugit Siunnersuisoqatigiit tusagassiuutinut nalunaarummi allapput.
Taakku oqarnerat naapertorlugu pisinnaatitaaffinnik soqutiginninneq, ilisimanninneq oqaluuserinninnerlu angalanermi annertusivoq.
- Inuit pisinnaatitaaffiisa pingaaruteqassusaat, suleqatigiissuteqartut innuttasullu nalinginnaasut eqqumaffigineruleraat, ersarissumik maluginiarparput. Minnerunngitsumillu, pisinnaatitaaffitta unioqqutinneqarnerisa qanoq kinguneqarsinnaanerat, Inuit Pisinnaatitaaffii pillugit Siunnersuisoqatigiinni suliniummik aqutsisoq, Kristina Kristensen oqarpoq
Inuusuttut sammineqartut
Suleqatigiissitsisoqarnerani inuit pisinnaatitaaffii pillugit saqqummiisoqarpoq. Filmi ’Twice Colonized’, ukioq manna Nuuk filmfestivalertoqarnerani aamma takutinneqartoq takutinneqarpoq, oqallinnermilu apeqqutit oqaluuserisassat tunngavigineqarlutik.
Suleqatigiissitsinermi peqataasut inuusuttuupput nunatsinni ilinniarfeqarfinneersuupput.
Suliniummi meeqqat inuusuttullu inuit pisinnaatitaaffiinik oqaluuserinninnermut ilaatinneqarnissaa, ilinniartinnissaat pisinnaatitaaffimminnik qanoq atuinissaat, inuiaqatigiinnilu ilisimasaqarnerulersitsinissaq, kisianni aamma inuusuttut ilinniarfeqarfiisalu akornanni oqallinnermik pilersitsinissaq siunertaapput.
Iluatsilluarporlu. Tusagassiuutinut nalunaarut naapertorlugu sumiiffinni sisamani suleqatigiissitsisoqareersoq nalinginnaasumik annertunerulertoqarpoq. Tassa pisinnaatitaaffinnik soqutiginninneq, paasisimasaqarneq, pisinnaatitaaffiit qanoq pingaartiginerat, pisinnaatitaaffiit oqaluuserinissaannut innuttaasullu pisinnaatitaaffeqarnerannik ilisimasaqarneq annertusivoq.
- Siunertat anguneqarsimanerat naliliinitta takutippaa. Ilaatigut apeqqummut: ”Ulluinnarni qanoq annertutigisumik inuit pisinnaatitaaffiinik oqaluuserinnissinnaasutut misigaat? ”akissummut: ”Annertuumik” tunngatillugu, inuit pisinnaatitaaffiinik oqaluuserinnissinnaaneq 5,83 %-imiit 17,21 %-imut annertusisimavoq, Kristina Kristensen oqarpoq.
Siunnersuisoqatigiit angalanertik 2024-mi nangissavaat, tassanilu avannaani, kujataani kitaanilu suleqatigiissitsisoqassalluni.