Siunissami meeqqat atuarfiat Tasiilami innuttaasunik ataatsimiisitsissutigineqalersoq
Meeqqat atuarfiata ukiuni aggersuni qanoq isikkoqarnissaanut eqqartueqataaniarlutik najukkami politikerit maannamuugallartoq pingasut peqataaniarlutik nalunaarsimapput. Tassalu Justus Hansen (D), Harald Bianco (IA) aamma Thomas Kristensen (A).
-Illoqarfiit anginerit avataanni atuarfiit kalaallinik ilinniartitsisoqarnissaat annertuumik ajornartorsiutigineqarpoq. Siorna timelærerit 25%-iupput, kalaallit ilinniartitsisut ilinniarsimasut 33%-it danskillu ilinniartitsisut ilinniarsimasut 42%-it. Kalaallit ilinniartitsisut danskinit ilinniartitsisunit ukiormanna siullerpaamik amerlanerupput, amerlassutsilli kissaatigisatta angunissaa suli ungasippoq. Kalaallit ilinniartitsisut sapinngisamik amerlanerpaanissaat pitsaanerpaarpaajuvoq. Tamanna aamma uanga atorfigisannut atuuppoq, atuarfiup pisortaa Jørn Holbech knr.gl-imut oqarpoq.
Tusarnaariat politikerit ilanngussaannut oqaaseqarnissaminnut tikilluaqqukutsoorpagut, aamma qinikkanut apeqquteqartoqarsinnaassaaq. Politikerit allat peqataarusuttut suli nalunaarnissaminnut periarfissaqarput. Ataatsimiisitsineq nal. 19.00 aallartissaaq akunnernillu marlussunnik sivisutigissangatinneqarluni.
-Susassaqarfimmi isumaginninnikkut ajornartorsiutit annertuupilussuupput, tamannalu atuarfimmi ilikkariartorsinnaassutsimut akornutaalluni. Atuartut sinilluarsimanatik ullaakkorsiorsimanatilluunniit atuariartortarunik tamanna ilikkariartorsinnaassusaannut akornutaassaaq. Atuartut ilikkariartornissaminnut piareersimanngitsut amerliartortillugit, atuaqatigiit tamarmiutillugit atuartinneqarnerat ajorsinarsigaluttuinnartarpoq. Tungiuinermut ingerlatsiviup isumaginninnermullu ingerlatsiviup suleqatigiinnerisigut atuarfittut ajornartorsiutigisatta annikillisarneqarsinnaanissaat neriuutigaarput. Qujanartumik atorfiit tamaasa inuttaqartippagut, tamannali sumiiffinni tamani atuutinngilaq, soorlu illoqarfinni minnerusuni nunaqarfinnilu. Assersuutigalugu maani illoqarfimmi 2011-miilli tarnip pissusaanik ilisimasalimmik sulisoqarsimanngilaq, taamaammat politikerit unammisassaqarluarput. Illoqarfimmi innuttaasut oqallitsitsilluta ataatsimiisitsinissatsinnut ornigulluarnissaat aaqqiissutissatullu siunnersuutinik politikerinut apuussaqarluarnissasat neriuutigaara, Jørn Holbech oqarpoq.
