Siumut uranimik inerteqquteqarneq pillugu: Aatsitassarsiorneq aatsitassarsiorfik ataasiinnaq pillugu matuvoq

Nunatsinni uranimik allanillu misissueqqaarneq, misissuineq piiaanerlu inerteqqutaalerput.

Tamanna Inuit Ataqatigiit Naleqqallu amerlanerussuteqarlutik marlunngornermi akueraat.

Tamannali illuatungiliuttut partiivinit partiimillu ikorfartortaasumit Atassummit akerliunngitsoorfiunngilaq.

Illuatungiliuttut partiivisa Siumup Demokraatillu Inatsisartunut qinersisoqarnerani oqallisaangaatsiartumut tassa Kuannersuarni aatsitassarsiornissamik suliniuteqarnermut tamanna kisimi eqquinani aatsitassarsiornermut tamarmut eqquinissaa ernumassutigaat.

AAMMA ATUARUK Urani naaggaaraat: Inatsisartuni akuersisut amerlanerussuteqaqqalaartut

Siumup siulittaasua, Erik Jensen Qanoruumut oqarpoq.

- Isumaqartoqarpoq inuiaqatigiinni aatsitassarsiorfik ataasiinnaq pillugu massakkut aalajangertoqartoq. Naamik, aatsitassarsiorneq tamaat pillugu aalajangertoqarpoq.

- Citronfjord, Hudson aatsitassarsiorfiillu assigiinngitsorpassuit massakkut apeqqusiipput, taamaattumik aningaasarsiorsinnaanitta innarlerneqarsinnaanera annertoorujussuaq apeqqut erfappoq, Erik Jensen oqarpoq.

Taassuma uranimik inerteqquteqarnerup kingunissaa Naalakkersuisunit misissorneqarluartikkusukkaluarpai.

Uranimik inerteqquteqarneq atorunnaarsinnianngikkallaraa

Maannamut inerteqquteqarnerup kinguneratigut Greenland Mineralsip Kuannersuarni aatsitassarsiorsinnaajunnaarpoq. Franskit aatsitassarsiutileqatigiiffiat, Orano aamma aatistassarsiorsinnaajunnaarpoq. Oranolli misissuinini Inatsisartunut qinersisoqaqqammerneranilli unitsereerpaa.

Naalakkersuisut aatsitassanut ulorianartunik qinngornilinnut allanut inerteqquteqalerniarnersut maanna apeqquterujussuanngorpoq. Assersuutigalugu thorium. Naalakkersuisut uranimut inerteqqutertik nutaaq atorlugu taamaaliorsinnaapput.

AAMMA ATUARUK Ullumi aalajangerneqassaaq: Uranimik akullit akuerineqassappat?

- Apeqquterparpassuit suli akineqanngitsut, tassa kisianni massakkut matuvoq. Tassa aatsitassarsiornermut sukarsuaq matusutut oqaatigineqartariaqartutut uangalu isumaqarpunga, Erik Jensen oqarpoq.

Siumut Naalakkersuisuni siuttuuleqqissagaluaruni uranimik inerteqquteqarnerup atorunnaarsinneqarnissaa sulissutigissagaluarpisiuk?

- Taanna naatsorsuutiginngilara massakkorluinnaq, ilaa nunatta pisariaqartikkaa sangujoraartumik inatsisiliornissarput. Taamaattumik tassunga tunngasumik nalilersueqqittussaassaagut, uagut isumaqanngilagut taanna qineqqusaarutigeqqissallugu uterteqqinneqarnissaanik oqariartornissarput pissusissamisuussasoq.

- Aamma aningaasaliisartut politikkikkut nikittoqarnerani tamatigut sangujoraartumik oqariartorfigineqarnissaat taanna orniginanngitsorujussuuvoq. Taamaattumik tassunga tunngasumik naatsorsuuteqanngilagut allanguinissamik massakkuugallartoq. Amerlanerussuteqartut aalajangernerat attapparput.