Politikki

URAN Siumut: Taasititsisoqassanngilaq

Innuttaasuni amerlanerussuteqartut uranisiortoqarnissaamut akuersaarput. Taasititsisoqarnissaanillu kissaateqartut aamma amerlanerussuteqartut misissuinerup ersersippaa.

Allattoq Mads Pedersen, Inge S. Rasmussen

juunip 24-at 2016 15:20

Nunarsuaq tamakkerlugu pinngortitaq pillugu suliniaqatigiiffiup, WWF-ip, aatsitsaanik uranitalinnik piaasoqarnissaa pillugu inuuttaasut isumaannik misissuititsinerata tikkuussinera nunatsinni partiit annersaasa uranitslinnik aatsitassarsiornissamut isumaannik allannguinngilaq.

HS Analysep misissuinerata takutippaa innuttaasut 54 procentii aatsitassanik uranitalinnik piiaasoqarnissaanut akuersaartut, tamannalu Siumumit tupaallaatigineqanngilaq.

- Aatsitassanik uranitalinnik aatsitassarsiornissamut innuttaasut isumaannik misissuititsinerit siuliini nalunngilarput akuersaartut amerlanerussuteqartut. Taamaammat misissuinerup inernera tupaallaatiginngilarput,
Jens-Erik Kirkegaard, Inatsisartuni atsitassanut ataatsimiitsitaliami siulittaasoq, KNR-imut oqarpoq.

WWF-ip misissuititsinerata aamma takutippaa innuttaasut 62 procentii urani pillugu apeqqummi tusaaneqarusuttut, tassami taasititsisoqarnissaanik kissaateqaramik.
Tamannali Siumukkunnut taasititsinissami eqqarsalersitsinngilaq.

- Siumumi qineqqusaarutigut piviusunngortinniarlugit tamaviaarpugut. Qineqqusaarnermilu oqarnikuuvugut taasititsiniarnata.

- Nunatsinni aningaasaqarnikkut siuariartussagutta inuussutissarsiutaasinnaasut tamaasa atorluarniartariaqarpagut, Kirkegaard oqarpoq.

Aamma atuaruk URAN Amerlanerussuteqartut taasititsisoqarnissaa kissaatigigaat

Inuit Ataqatigiit taasititsinissamik kissaateqarnertik innuttaasunit tunuliaqutserneqartoq isumaqarput.

- Apeqqut taanna Inatsisartut upernaakkut ataatsimiinnerini arlaleriarluta siunnersuuteqarluta qaqipparput, ikinnerussuteqartarlutali.
- Angertut naaggaartullu tusaaneqarnissaat kissaatigigatsigaarput massakkullu misissuinerup takutippaa innuttaasuni amerlanerussuteqarluartut taasitsitsisoqarnissaanik aamma kissaateqartut, Muté B. Egede, Inatsisartut aatsitassanut ataatsimiitsitaliaani siulittaasup tullia KNR-mut oqarpoq.

Misissuineq WWF-imit HS Analysemut suliakkiutigineqarmat inuit 722-t tusarniarneqarsimapput. Misissuinerup inernera, ajoraluartumik qallunaatuinnaq allagaasoq, allaaserisap ataaniittoq misissuataarsinnaavat.

Nutaarsiassami kukkunermik nassaarsimaguit uunga allaffigineqarsinnaavugut.