Siumut Socialdemokraatinit akiliunneqarput
Qineqqusaarnermi takoqqusaarutit suliaritinnerisa saniatigut qineqqusaarnermi pissusilersuutissat periusissallu aamma pikkorissarfigineqarput socialdemokraatit akiligaannik.
Siumut siulittaasuata Aleqa Hammondip Qanoruumut oqaatigaa klippekortitut ittunik pissarsisimallutik inuit pikkorissut piffissami aalajangersimasumi siunnersortigisinnaanngorlugit. Qineqqusaarnermulli tunngasuinnartigut ikiorneqanngillat. Aleqa Hammondip oqaatigaa Siumut sinnerlugu qinigaasup aamma socialdemokraatit atorfilittarpassui immikkut ilisimasallit atorsinnaaneri qulakkeersimagitik, taamaasilluni isertitamik sakkussaqarnissaa qulakkeersimallugu.
Niels Thomsenip Demokraatineersup eqqarsarnartoqartippaa Siumukkut socialdemokraatinut qimmiaraataalernissaat taamaasilluni aqqutissiorneqarsimasinnaammat.
Aleqa Hammondilli pisoq ernumanartinngilaa Siumup anersaava tuninnginnerarlugu anguniakkatik pingaartikkamikkit, massakkullu angussangatippaat statsministerimik qanimut suleqateqarnissartik.
