Siumut Sisimiuni ilaasortaasimasoq piginnaatitaanermik atornerluisimasutut unnerluutigineqartoq
Siumup Sisimiuni immikkoortortaqarfiata siulrsuisuini ilaasortaasimasoq piginnaatitaanerminik atornerluisimasutut eqqartuussivimmi suliassanngortinneqarpoq.
Sermitsiaq.ag taama allappoq.
Ilaasortaasimasoq immikkoortortaqarfiup kontoaninngaanniit imminut iluanaartinniarluni 130.000 koruuningajannik tigusisimasutut unnerluutigineqarpoq.
Unnerluussut KNR-ip pissarsiarivaa, taannalu naapertorlugu, aningaasat kontonut allanut ukiup aappaa affap ingerlanerani nussorneqarput.
Immikkoortortaqarfimmut ilaasortaasimasup imminut ilaquttaminullu pissarsisimasutut unnerluutigineqartoq, unnerluussutip takutippaa.
Siumut Sisimiup siulittaasua, Evelyn Mølgaard, suliamut tunngasumik maannakkut KNR-imut oqaaseqarusunngilaq.
- Suliaqarpat, inunnut ataasiakkaanut tunngasuummat, oqaaseqarfigisinnaanngilarput. Suliaqarpat, suliaq naammassippat oqaaseqarfiginissaa naapertuussaaq, Eveleyn Mølgaard, KNR-imut oqarpoq.
Siumup allattoqarfianut suliaq oqaaseqarfigeqqullugu KNR-imit saaffiginnippugut, tasssanngaanniilli Siumumi immikkoortortaqarfiup siulittaasuanut innersuussivoq.