Siumut: Nunatsinni coronamut illersuiniarluta taamaatitsivugut
Siumumi siulittaasussamik septembarimi aamma taasisoqassanngilaq. Aamma nuna tamakkerlugu ataatsimeersuartoqassanngilaq. Taakku piffissaligaanngitsumik kinguartinneqarput.
Coronap aarlerinarnera pissutaasoq, Siumup aaqqissuusaanerani siulittaasup tullia, Evelyn Frederiksen oqarpoq.
Nunatsinnili tunillatsissimasoqanngivippoq – soorli ataatsimeersuarnissamut ullut 17-iinnanngortut aatsaat taamaatitsisoqarnersoq – Evelyn Frederiksenip nassuiaatigisinnaanngilaa. Siulersuisulli corona pillugu pissutsit ullormiit ullormut malinnaaffigigaat oqaatigaa.
Katersuunnissamut malittarisassat
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
- Innuttaasut peqqinnissaat partiillu ataqqinassusaata illersornissaa pillugit tamanna qinersimavarput.
- Ilaasortatta 60-it nunatsinni sumiiffinnit 36-neersut akornanni tuniluuttoqalerataassagaluarpat taama ajornartorsiuteqalissaagut. Aalajangiinitsinni nunarput parteerpullu soorunami eqqarsaatigivagut, Evelyn Frederiksen KNR-imut oqarpoq.
AAMMA ATUARUK Erik Jensen: Siumup ataatsimeersuarnissaa kinguartinneqarpoq
Siumut Ilulissani septembarip ulluisa sisamaannit arfernanut ataatsimeersuartussaagaluarpoq.
Partiimi ilaasortat 68-it peqataasussaagaluarput, siulittaasussamilli taasisoqartussaagaluarluni.
Siulersuisut ataatsimeersuartitsinissamut maanna nutaamik ulluliinialerput.
Aappassaanik kinguartitsisoqartoq
Partii ataatsimeersuartoqarnissaanik aatsaat kinguartitsinngilaq.
Nuna tamakkerlugu ataatsimeersuarneq juulip ulluisa arfineq-pingajuannit qulinganut ingerlanneqartussaanikuugaluarpoq, partiilli siulersuisuunerisa ataatsimeersuarnerup qarasaasiat atorlugit ingerlanneqarnissaa ullullu ataatsip ingerlanera kisimi pinissaa maajimi aalajangerpaat.
Ataatsimeersuartoqarnissaata aappassaanik taamaatinneqarnera uggornartoq, Evelyn Frederiksen isumaqarpoq.
- Pilersaarummik allanngortitseqattaarneq soorunami uggornarpoq. Kisianni uanga illilluunniit coronavirusimik aqutsisinnaanngilaq, taanna oqarpoq.
AAMMA ATUARUK Kim Kielsen politikerit katersuussinnaanerat pillugu: Tunngaviusumik inatsit aallaaviuvoq
Siumut ataatsimeersuartitsiniarnini pissutigalugu isornartorsiorneqangaatsiarsimavoq. Januaarimmi ulluisa 31-iata tungaanut aaqqissuussinerit kommunimiit kommunimut angalalluni peqataaffigiartoqqusaanngillat.
Aaqqissuussinernut annerusut taamaallaat politikeriugaanni peqataajartortoqarsinnaavoq. Allalli peqataajartoqqusaanatik. Taamaammat kattuffiit peqatigiiffiillu soorlu kulturikkut illorsuup Katuap, atuakkiortut peqatigiiffiata, SIK-p Sulisitsisullu Naalakkersuisut sapaatini akunnerni qassiiusuni isornartorsiungaatsiarpaat.
Naleraq sapaatip-akunnerata siuliani taamaatitsiinnartoq
Illuatungiliuttut sapaatip akunnerata siuliani ilanngupput. Inuit Ataqatigiit, Atassut, Suleqatigiissitsisut Partii Nalerarlu Naalakkersuisunut ammasumik allagaqarlutik corona pillugu malittarisassat tukannerarlugillu ataqatigiinnginnerarpaat.
Partii Naleqqap ataatsimeersuarnissani ukiaru ataatsimeersuarnissani tallimanngormat kinguartippaa.
- Partiinut allanut akulerutissanngilagut. Kisianni unneqqarissuseqarnissaq inatsisinillu malinninnissaq kissaatigigutsigu taama politikeriusugut akisussaassuseqarlutalu siulersuinermik takutitsissaagut, siuliuttaasoq, Hans Enoksen KNR-imut oqarpoq.