Erik Jensen: Siumup ataatsimeersuarnissaa kinguartinneqarpoq
Aamma Siumumi septembarimi siulittaasunngorniuuttoqassanngilaq. Tamanna piffissaligaanngitsumik kinguartinneqarpoq.
Tamanna Siumup Sisimiuni immikkoortortaqarfiani siulittaasup,siulittaasumullu qineqqusaarniartup, Erik Jensenip uppernarsarpaa.
- Siumup siulersuisuuneranit ataatsimeersuarnissaq piffissami killiligaanngitsumi kinguartinneqartoq ippassaq paasivarput.
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Erik Jensenip kinguartitsineq sumik pissuteqarnersoq oqaatigerusunngilaa, taassumali Siumup siulersuisuuneri innersuussutigai.
AAMMA ATUARUK Kielsen coronamut atatillugu isornartorsiorneqarnerminut illersortoq: Issiaannassaanga!
- Siulittaasunngorniuunnissamut piareersarnikuulluni soorunami uggornarpoq. Kisianni allatut ajornaqaaq aamma ataqqisassarivarput, taamatullu aalajangerneq allanngortissinnaanngilarput, taamaattumik siulittaasunngorniarnermut sulinera ingerlatiinnassavara, taanna oqarpoq.
Coronap ilungersunartorsiortitsinera
- Taanna tusaatissatut tiguinnassavarput, Covid-19-illu nunani allani nunatsinnilu sunniutai pissutigalugit taamatut aalajangerneq paasinarluinnarpoq.
Siumut Ilulissani septembarip ulluisa sisamaannit arfernanut ataatsimeersuartussaagaluarpoq.
Partiimi ilaasortat 68-it peqataasussaagaluarput, siulittaasumillu taasisoqartussaagaluarluni.
Siumulli ataatsimeersuarnissaa isornartorsiorneqangaatsiarpoq. Januaarimmi ulluisa 31-iata tungaanut aaqqissuussinerit kommunimiit kommunimut angalalluni peqataaffigiartoqqusaanngillat.
Aaqqissuussinernut annerusut taamaallaat politikeriugaanni peqataajartortoqarsinnaavoq. Allalli peqataajartoqqusaanatik. Taamaammat kattuffiit peqatigiiffiillu soorlu kulturikkut illorsuup Katuap, atuakkiortut peqatigiiffiata, SIK-p Sulisitsisullu Naalakkersuisut sapaatini akunnerni qassiiusuni isornartorsiorpaat.
Naleraq sapaatip akunnerata siuliani taamaatitsisoq
Illuatungiliuttut sapaatip akunnerata siuliani ilanngupput. Inuit Ataqatigiit, Atassut, Suleqatigiissitsisut Partii Nalerarlu Naalakkersuisunut ammasumik allagaqarlutik corona pillugu malittarisassat tukannerarlugillu ataqatigiinnginnerarpaat.
Partii Naleqqap ataatsimeersuarnissani ukiaru ataatsimeersuarnissani tallimanngormat kinguartippaa.
- Partiinut allanut akulerutissanngilagut. Kisianni unneqqarissuseqarnissaq inatsisinillu malinninnissaq kissaatigigutsigu taama politikeriusugut akisussaassuseqarlutalu siulersuinermik takutitsissaagut, siuliuttaasoq, Hans Enoksen KNR-imut oqarpoq.
Siumut ataatsimeersuarnissaa aappaassaanik maanna kinguartinneqarpoq
AAMMA ATUARUK Siumup ataatsimeersuarnissaa kinguartinneqassasoq aamma qarasaasiatiguussanngitsoq
Nuna tamakkerlugu ataatsimeersuarneq juulip ulluisa arfineq-pingajuannit qulinganut ingerlanneqartussaanikuugaluarpoq, partiilli siulersuisuunerisa ataatsimeersuarnerup qarasaasiat atorlugit ingerlanneqarnissaa ullullu ataatsip ingerlanera kisimi pinissaa maajimi aalajangerpaat.
Partiip siunissaa pillugu aamma oqallittoqartussaajunnaarpoq. Pilersaarulli taanna Siumup immikkoortortaqarfiisa isornartorsiuinerata kingunerisaanik taamaatiinnarneqarpoq, ullullu septembarip sisamaanit arfernanut aalajangiunneqarluni.
Siumup ataatsimeersuarnissaa qaqugu pissanersoq suli ilisimaneqanngilaq.
