Siumup ataatsimeersuarnissaa kinguartinneqassasoq aamma qarasaasiatiguussanngitsoq
Siumumi ilaasortat ukioq manna ataatsimeersuarnissaminni qarasaasiamik assiliissutaa ikumatittariaqarunnaarpaat.
Partiip sapaatip-akunnerata naanerani ataatsimiinnerani ataatsimeersuarnerup qarasaasiaq atorlugu ingerlanneqanginnissaa amerlasuut isumaqatigiinneratigut erserpoq.
Partiip ilaasortai qassiiusut – ilaatigut Inga G. Markussenip illoqarfiit pingaarnersaanni Siumumi siulittaasuusup tamanna oqaatigaat.
- Siumumi ataatsimeersuarnissap kinguartinneqarnissaa naatsorsuutigineqalerpoq. Kissaatigisavut ataqqineqartutut isikkoqalerpoq, Siumup Nuummi immikkoortortaqarfiani siulittaasoq Inga-Dora G.Markussen KNR-mut taama oqarpoq.
Partiip siulersuisuunerisa ataatsimeersuarnerup ullunik pingasunik sivisussuseqarani ullormik ataasiinnarmik sivisussuseqarnissaa aalajangersimallugu maajip ulluisa 25-anni nalunaarutigigaluarpaat.
AAMMA ATUARUK Siumumi siulittaasumik qinersineq qarasaasiatigut ingerlanneqassasoq
Ataatsimeersuarneq qarasaasiaq atorlugu ingerlanneqassasoq partiillu politikkikkut ukiunut tulliuttunut anguniagassaata oqallisiginissaa 2021-mut kinguartinneqartoq siulittaasumillu qinersinissaq pilersaarut malillugu ingerlanneqassasoq nalunaarutigineqaraluarpoq.
Tamannali Siumup nunatsinni sumiiffinni tamani immikkoortortaqarfiinit isornartorsiorneqarpoq, partiillu sapaatip-akunnerata naanerani ataatsimiinnerani qarasaasiaq atorlugu naatsumik ataatsimeersuarnissap ingerlanneqarnissaa unitsiinnarneqassasoq aalajangerneqarpoq.
Siulittaasumik qinersineq
Partiimi ilaasortat aalajangiiffigisassaat qassiiupput.
Assersuutigalugu partiimi siulersuisuunernut qinersisoqassaaq, ilaasortallu Kim Kielsen siulittaasutut ingerlaannassanersoq imaluunniit Vivian Motzfeldt Erik Jenseniluunniit siulittaasunngussanersoq aalajangertussaavaat.
Tamatuma saniatigut partiip sammivissaanut atatillugu ukiunut pingasunut pilersaarutaa kingullermik 2017-imi ataatsimeersuartoqarnerani atulersinneqartoq qaangiuttussaavoq.
Illoqarfinni peqatigiiffiit isornartorsiuinerminni partiip ukiuni tulliuttuni pingasuni anguniagassaanik oqallisiginnissimanani siulittaasussamik taasisoqarsinnaanngitsoq ilaatigut oqaatigaat.
AAMMA ATUARUK Siumup immikkoortortaqarfii: Ataatsimeersuarnissaq ukiarumut kinguartilli
- Politikki sammivilimmik eqqartorneqarnissaa ujartorneqartoq, taannalu tusaallutigit ingerlateqqikkatsigu siulersuisuunernut, taanna misigisimavugut massakkut tusaaneqarluta ilaasortat immikkoortortaqarfiillu piumasaat ataqqineqartutut isikkoqalerpoq, Inga Dora G. Markussen oqarpoq.
Siulersuisuunerilli ataatsimeersuarnissap kinguartinnissaanut inaarutaasumik suli aalajangiinngillat. Siulersuisut ullumik ataatsimoorluni partiip siunissaanik oqalliffigisinnaasaanik nassaaqqaarniarput.
