Siumut Naalakkersuisullu: Erik Jensen suli oqaaseqarumanngitsoq
Siumup siulittaasua aamma Naalakkersuisunut siulittaasuussava? Apeqqut taanna Siumup novembarip naanerani atatsimeersuarnermini nutaamik siulitatasoqalermalli suli akissutissarsineqanngilaq.
Tassalu Naalakkersuisoqatigiit 2020-mi maajimi isumaqatigiissutertik tunngavigalugu maanna suli sulipput.
AAMMA ATUARUK Erik Jensen isumaqatiginninniartoq: Siulittaasunngortiinnarneqassava imaluunniit qinersisoqassava?
Siulittaasunngortorli Erik Jensen Naalakkersuisunut siunissami qaninnermi siulittasunngorumaarluni januaarip arfernani qularutiginngilaa:
- Oqaloqatigiinnerit qanoq inississanersut apeqqutaaginnarpoq, qanorlu aaqqiissanersugut qaqugorpiaassanersorlu, taanna siumoorlugu oqaatigisinnaanngilara.
Maannali sapaatit akunnerat qaangiussimanartoq akisut qaninnerulersimanngilaq.
Apersorneqarumanngitsoq
- Ataatsimiinnerit suli ingerlapput. Sulilu ataatsimiinnerit ingerlateqattaaqqittussaagakkit, oqaaseqarsinnaanngikkallarpunga. Eqqissillungalu sulinera ingerlakkusukkakku, maannangaaq tusagassiuutinut oqaaseqarusunngilanga, Erik Jensen, KNR-imit apersorneqarami immiunenqarumanmngitsoq, oqarpoq.
Taassuma naalakkersuisoqatigiinni partiit allat, tassalu Demokraatit aamma Nunatta Qitornai ataatsimeeqatigisaqattaarpai.
Ataatsimiinnerit nangittut
Oqaloqatigisai aamma taama nutaarsiarsiffigiuminaatsigaat.
- Erik Jensenimut tunngatillugu Demokraatit oqaaseqarsinnaanngikkallarput, ataatsimiinnerit suli ingerlanneqarmata. Ataatsiminnerit isumaqatigiinnerillu inisseriarpata, avammut nalunaaruteqarumaarpugut, Demokraatit allafianniit nalunaarput.
Naalakkersuisoqatigiinni partiit minnersaanni, Nunatta Qitornaanni, siulittaasup Vittus Qujaakitsup, aamma aningaasaqarnermut naalakkersuisuusup, ataatsimiinerip torersumik ingerlasut unnerpai:
- Siumut siulittaasortaavata ataatsimeeqatigisimanera uppernarsarsinnaavara. Maannamut ersarinnerusumik aalajangiisoqanngilaq, taamaattumik pissutsit itinerusumik oqaaseqarfigisinnaanngilakka. Ataatsiminnerit oqaloqatigiinnerillu torersumik ingerlanneqarput nanginneqarumaarlutillu, taanna allappoq.
AAMMA ATUARUK Naalakkersuisoqataasut Erik Jensen tupaallaatigigaat
Inatsisartuni gruppit, Naalakkersuisooqatigiinnermi tunuliaqutaasut, suli ataatsimoorlutik oqaloqatigiinngitsut, taasuma ilissimatitsissutigaa. Taava aamma Siumup ataatsimeersuarnerata kingorna suut qaqinneqassanersut partiinut suleqataasunut apuunneqarnissaat utaqqimaarpaa.
Naalakkersuisut siulittaasuat, Kim Kielsen, siulittaasunngorniunnermili Erik Jensen-imut ajorsarami, taassuma Naalakkersuisunut siulittaasunngornisamik kissaataa isummerfiginngilaa.
Partiilli katersuuffiunissaanut kaammattuivoq:
- Siumut ataatsimoorfiussaaq. Nunaqarfiit, illoqarfiit illoqarfiillu anginerusut ataatsimoortissavagut. Tamanna pisussaaffigaarput, Kim Kielsen oqarpoq.