Siumut kalaallimik atorfinitsitseqqusivoq
Kommunaldirektør Henrik Rafn atorfimminit marsip naanerani soraassaaq. Kommunaldirektøritaassap kommunalbestyrelsi qinigaarlaaq suleqatigiinnissamillu isumaqatigiissummik malitaqartussaq suleqatigilertussaassavaa.
Siumut, kommunalbestyrelsimi maanna amerlanerussuteqartuusoq, atorfinitsitsinissamut ersarissumik piumasaqataateqareerpoq.
- Kommunaldirektøritaassap kalaaliunissaa neriuutigaara, Qaasuitsup Kommuniani Siumup gruppiani siulittaasoq Karl Kristian Kruse, tusagassiorfinnut nalunaarummini taama allappoq.
- Kalaallit qullersatut atorfeqalernissaat anguniarlugu ilinniagaqarnissaat 1979-imiilli piumasarilerparput. Maanna 2013-imut killippugut kalaallillu ilinniarluarsimasorpassuit pigalutigit. Taakku atorluarniartigit, Karl Kristian Kruse oqarpoq.
