Siumut Issittumi Sakkutooqarfiup Amerikamiut aqqartartuanut ilisimasaanik akissuteqaqqusisoq
Amerikamiut aqqartartuat Nuummi 7 sømilimik ungasitsisumi imaanit arfininngormat puttallarpoq.
Issittumi Sakkutooqarfik aqqartartumi inuttamik ingerlanneqartariaqartumik aallertoqarsimasoq arfininngornermi aamma nalunaarutigaa.
Inuk pineqartoq piaartumik napparsimmaveqarfimmi ikiorserneqartariaqarmat Nuummi napparsimmaviliaanneqartoq, Issittumi Sakkutooqarfiup nassuiaatigaa.
Pisoq partiimit Siumumit politikkikkut maanna sammineqarpoq.
Partiip naalakkersuisunut allakkamini ammasumi aqqartartup suna siunertarineraa aamma allanik nunatta imartaaniittoqarnersoq akissutissarsiorpaa.
- Tassami aqqartartoq taanna kisimiippa imaluunniit arlariiuppat kiisalu sunik imaqarpa sunalu siunertaralugu nunatta sineriaani angalava? tusagassiuutinut nalunaarummi apeqquteqarpoq.
Partiip siulittaasorisimasaa akissutissarsiortoq
Tusagassiuutinut nalunaarut Erik Jensenimit (S) allagaavoq. Partiip siulittaasorisimasaa Nunanut allanut Sillimaniarnermullu Ataatsimiititaliami ullumikkut ilaasortaavoq.
Taassuma Issittumi Sakkutooqarfiup aqqartartoq arfinngorneq sioqqullugu ilisimasaqarfigisimaneraa paaserusuppaa.
- Angalasussaasimappat Issittumi Sakkutooqarfiup (AKO-miit) tamanna ilisimareerneqarnersoq kiisalu aqqartartunik allanik nunatta sineriaani angalasoqartarnera/angalasoqarsinnaanera nakkutigilluarneqarnersoq paaserusunnarpoq?
Partiillu siulittaasorisimasaata aqqartartumut tunngasoq aalisarnermut atassuserpaa.
- Ilisimasatsitullu sineriassuatsinni aalisarneq piniarnerlu inuussutissarsiutaammata pingaarutillit, inuussutissarsiortunut aammalumi uumasunut pinngortitamullu sunniuteqarnerlussinnaanerat eqqarsaatigalugu paasissutissanik uatsinnut apuussinissaq isumaqarpunga pingaarutilerujussuusoq, Erik Jensen tusagassiuutinut nalunaarummi allappoq.
Erik Jensenip suliamik paasiniaanermini naalakkersuisunut paragraf 37-mik apeqquteqarniarluni paasissutissiissutigaa.
Issittumi Sakkutooqarfik
KNR-ip Issittumi Sakkutooqarfik aqqartartumi pisumut atatillugu oqaaseqartinniarlugu attaveqarfigaa.
Taakkuli allanik ilanngussassaqarnatik akissuteqarput.
- Amerikamiut oqartussaasuisa qanimut suleqatigineratigut aallertoqarpoq. Illersornissaqarfik nunat allat suliaqarneranut tunngasut tunngaviusumik oqaaseqarfigineq ajorpai, Issittumi Sakkutooqarfik allappoq.
