Siumut: Inatsisartut Naalakkersuisunut oqaaseqaataat mianersoqqussutaanngilaq

-  Inatsisartut ataatsimoortut Pituffimmi  kiffartuussinissamut isumaqatigiissutip anaaneqarsimanera ilungersuumminartutut isigaat,  inatsisartuni partiit tamarmiusut oqaaseqaatertik taama aallartippat.

- Siunissami taamatut pisoqaqqinnginnissaa pillugu partiit tamakkerluta matumuuna suleqatigiissuteqarniarpugut,  Naalakkersuisut siulisitsisui taama erseqqissaateqarput. 

Inatsisartut tamarmiullutik taama oqaaseqaammik saqqummiussipput,   Pituffimmi 

kiffartuussinissamik isumaqatigiissut  suliffeqarfimmit kalaallinit piginneqataaffigineqartumit annaaneqarmat taanna aningaasanik 100 millioner kr-nik  arlalinnik naleqartoq.

Tamatuma kingorna IA-mit erseqqissaatigineqarpoq Naalakkersuisunut oqaaseqaat Naalakkersuisunut mianersoqqussutaasoq.

Inatsisartuni partiit Naalakkersuisunut oqaaseqaataat Naalakkersuisut suli isummerfiginngilaat, IA isumaa malillugu mianersoqqussutaasoq.

Inatsisartut ataatsimoorlutik  Naalakkersuisunut oqaaseqaataat mianersoqqussutitut taaneqarnissaa Siumumit tulluartuusorineqanngilaq.

- Una oqaaseqaat siumut isigaluta  suleqatigiinnissamik oqariartuut, mianersoqqussutitullu isiginagu, Kirkegaard oqarpoq,  illuatungiliuttut taama oqarnerat tupaallaatigilaarparput, uagummi misigisimagatta suleqatigiinnissaq  siunertaralugu oqaaseqaateqarluta, Jens Erik Kirkegaard Pituffimmi kiffartuussinissamik isumaqatigissut pillugu inatsisartuni  apeqquteqaat aallaavigalugu oqallittoqarnerani Siumut sinnerlugu oqaaseqartoq taama oqarpoq.

Jens Erik Kirkegaardip oqarnera malillugu ataatsimoorluni oqaaseqaat mianersoqqussutitut isigineqassanngitsoq taanna isumaqarpoq  naak oqaaseqaammi kiffartuussinissamik isumaqatigiissutip annaaneqarsimanera ilungersuumminartutut inatsisartunit isigineqaraluartoq.

- Isumaqarpugut ilungersuumminartuusoq  kiffartuussinissamik isumaqatigiissup annaaneqarnera, kisianni ukua maannakkut Naalakkersuisuusut sulinerat pillugu  mianersoqqusinngilagut, illuatungiliuttut ima isumaqarpata maannakkut naalakkersuisuusut sullarlussimasut taava aamma mianersoqqussummik tunineqartariaqartut   taava oqaaseqaat allatut imaqarsimassagaluarpoq kisianni uuma ilungersuumminarnera tassaavoq  nunatta aningaasatigut annaasaqarsinnaanera, Jens Erik Kirkegaard  Siumut taama oqarpoq.

Inatsisartut ataatsimoorlutik Naalakkersuisunut oqaaseqataat pillugu Naalakkersuisut radioaviisimit oqaaseqartinniarneqaraluarput  manna tikillugu iluatsinngitsumik