Siumut Ilulissat: Tunuliaqutsiiunnaarnitsinnut aningaasat peqqutaapput
Siumut Ilulissat Minik Høegh-Dam-imut eqqartuussivimmi suliamik ingerlasoqartoq ilisimasimavaat.
Eqqartuussissoqarfik Sermersuumilu pinngitsuutitaasoq aamma nalusimanagu, Siumut Ilulissani partiillu Siumup siulersuisuunerini ilaasortaq, Bernhardt Olsen oqarpoq.
Aningaasalli suliami pineqartut Siumup gruppeanut oqaatigineqarneq ajorsimapput.
AAMMA ATUARUK Minik Høegh-Dam hashimut tunngatillugu suliamut oqaaseqarnianngitsoq
Siumup Ilulissani immikkoortortaqarfiata Minik Høegh-Dam Avannaata Kommuniani borgmesteritut tunuliaqutsersinnaanngikkaa, Bernhardt Olsen naqissusiivoq.
- Uani suliami nutaartaavoq aningaasarpassuit saqqummiunneqarnerat. Tassa taanna uagut tunuliaqutsiisinnaajunnaarnitsinnut tunngaviuvoq. Angerlarsimaffimmi aningaasarpassuit nassaarineqartut saqqummiunneqarnerat taanna tunngaviuvoq, taanna siornatigut ilisimasimangilarput, Bernhardt Olsen oqarpoq.
Naleraq suli suleqataasoq
Siumup Ilulissani immikkoortortaqarfiata Minik Høegh-Dam borgmesterissatut tapersersorunnaarlugu paasitinniarlugu pissarsiariniarsarisimagaluarpaa.
- Attaviginiarlugu pilooraluarparput attavigiuminaappoq. Taamaammat uagut immikkoortortaqarfimminngaanniit utaqqiinnarsinnaannginnatsigu aalajangertariaqarsimavugut. Attaviginiarsaralugu piffissaq ingerlatiinarsinnaannginnatsigu, Bernhardt Olsen oqarpoq.
AAMMA ATUARUK Borgmesterimut suliap kingorna: Minik Høegh-Dam Avannaata Kommuniani tapersersorneqarunnaartoq
Taamak pisoqaraluatoq Avannaata Kommuniani Siumup Naleraq suli politikkikkut isumaqatigiissuteqarfigaa.
Siumulli gruppeanut ilaasoq borgmesterinngussasoq Bernhardt Olsenip naqissuserpaa.
- Politikkikkut isumaqatigiissuterput allanngortinngilarput, aamma Naleqqakkut ataatsimeeqatigereerpagut. Taannartaa ajunngilaq allanngunngilaq. Taamaallaat uani borgmesteri kinaassanersoq partiitta iluani aalajangerutsigu kisimiulerpoq, Siumut Ilulissani siulersuisunut ilaasortaq, Bernhardt Olsen oqarpoq.
Avannaata Kommuniani Siumumiit qinigaasuni Uummannarmiu Sakio Fleischer 135-inik taaguunneqarnikoqmaanna qinigaanerpaavoq.