Siumut Demokraatillu oqaaseqartartuisa aningaasanut inatsisissaq isornartorsiorpaat
- Namminersorlutik Oqartussani ingerlatsinermi aningaasartuutinik ukiumut 50 millionit koruuninik sipaarniartoqarnera nuannaarutigaara, Jens Immanuelsen, Siumumeersoq, Aningaasaqarnermullu Akileraartarnermullu Ataatsimiititaliami siulittaasoq ilaatigut oqarpoq.
Partiinili sinnerlugit apeqquserutani Jens Immanuelsenip taava eqqartulerpai.
Inuit Issittormiut Siunnersuisoqatigiivinut ICC-mut aningaasaliissutit 1 millionit koruuninik appaavigineqarnissaannik siunnersuutip attatiinnarneqarnera, Jens Immanuelsenip eqqarsaatigilluaqquaa.
Utoqqalinersiallit aaqqissuussivigineqartariaqarput
Soorlu aamma utoqqalinersiallit aaqqissuussivigineqartariaqarnerat Siumumit ujartorneqartoq:
- Utoqqalinersiaqarneq piginnaatitaaffiuvoq taamaattorli saniatigut isertitaqartoqarsimatillugu utoqqlinersialimmut kingunerlutsinneqartarnera ilaatigut utoqqalinersiat millisinneqartarput, taamaammat misissorneqartariaqarpoq saniatigut isertitaqartarnerup qaffanneqarsinnaanera, Jens Immanuelsen, Siumumeersoq, oqarpoq.
Inatsisartut ataatsimiittarfissaannik nutaamik sanasoqarnissaanut Naalakkersuisut suli aningaasaliisimannginnerat, Demokraatit aningaasaqarnermut akileraartarnermullu tunngasunut oqaaseqartittagaata Tillie Martinussenip nersualaarpaa.
- Iluarisimaarparput inatsisartut ataatsimiittarfissaat 100 milliuunilikkaanik arlalinnik akeqartussaq Aningaasanut Inatsissatut siunnersuummit peerneqarmat aamma suna tamaat atorlugu sulissutigiumaarparput matuma aalajangernerup allanngortinneqanngilluinnarnissaa, Tillie Martinussen, Demokraatit sinnerlugit ilaatigut oqarpoq.
Takornariaqarneq sipaarniarfiginagu
Takornariaqartitsinermik sulialimmut Visit Greenlandimut aningaasaliissutit 1,5 millionit koruuninik ilanngaavigineqarnissaannut siunnersuutip attanneqarnera taassuma Demokraatit sinnerlugit saqqummiussinermini apeqquserpaa:
- Demokraatini takornariaqarnerup sipaarfiginissaa peqataaffiginianngilarput. Isumarput naapertorlugu Takornariaqarneq tassaavoq inuussutissarsiut pitsaasumik neriartornissamut sullivinnillu pilersitsinissamut periarfissallit ilaat, Tillie Martinussen oqarpoq.
