Siumut Demokraatillu akileraarummik qaffaanianngitsut

Kalaallinut Københavnimi peqqissartunut taakkununngalu ingiartaasunut atugassarititaasut pitsanngorsarniarlugit nuna tamakkerlugu akileraarutip qaffanneqarsinnaanera peqqissutsimut naalakkersuisup Agathe Fontainip misissorniarpaa.

Peqqissutsimulli naalakkersuisup Siumumiit Demokraatiniillu taperserneqarnissani naatsorsuutigisinnaanngilaa. 

Peqqissartummi ingiartillu atugaat pitsaanerulissappata aningaasat pigeriikkat atorlugit pingaarnersiuineq aaqqissuusseqqinnerlu aqqutissaasut taakku isumaqarput.

 - Qaffaanissamik oqariartuuteqarneq isumaqatiginngilarput. Massakkut akileraartarnerup iluani aaqqissuusseqqinnissamut misissuinissaq orniginarnerusutut isigigatsigu, Laura Táunajik Siumumeersoq, Peqqissutsimut ataatsimiititaliami siulittaasoq, KNR-imut oqarpoq. Taassuma aamma oqaatigaa pineqartunut atugassarititaasut ilumut pitsaanerusariaqartut. 

Akileraarummik qaffaanissamik nipeqarneq Demokraatit tupaallaatigigaat Randi Vestergaard Evaldsenip oqaatigaa. Taassuma erseqqissaatigaa Naalakkersuisooqatigiit qinigaaffik naallugu akileraarummik nikisitsinnginnissamik isumaqatigiissuteqarnerat.

Naalakkersuisullu atukkanik pitsaanerulersitsinissamik kissaateqarnera paasisinnaallugu Randip oqaatigaa, akileraarnerulernikkulli tamanna pinissaa aqqutissaasorinngilaa. Peqqinnissaqarfimmi aningaasanullu inatsimmi aningaasat naammareersut Evaldsen isumaqarpoq.  
  
- Isumaqarpunga allatut aaqqissuussisoqartariaqartoq. Namminersorlutik Oqartussat aamma Naalakkersuisut tulleriiaarinninnissamut atorluaanissamullu pisussaaffeqarput. Akileraarutip qaffanneratigut inuup kaasarfianiit tigusiinnarluni aaqqiisoqarsinnaasorinngilara, Randi Vestergaard Evaldsen Demokraatineersoq KNR-imut oqarpoq.

Akileraarutip qaffanneqarnissaanut atatillugu aamma Danmarkimi kalaallit peqqissartut illuata siunissami allilerneqartariaqarsinnaanera eqqarsaatit ilagaat.