Siumut novembarip naalernerani ataatsimeersualerpoq

- Ataatsimeersuarnissap pilersaarutaasimasup ingerlanneqarnissaa naatsorsuutigaarput. Tassanilu nalinginnaasumik ulluni pingasuni ataatsimeersuarnerup malittarisassat malillugit ingerlanneqassasoq naatsorsuutigaarput, Evelyn Frederiksen oqarpoq.

Aaqqissuisulli sumi ataatsimeersuartoqassanersoq, ataatsimeersuaqataasussallu najuutissanersut imaluunniit qarasaasiatigut ataatsimeersuartoqassanersoq suli aalajanginngilaat. Pilersaarusiornerali ulluni tulliuttuni naammassippat nalunaarutigiumaarlugu Evelyn Frederiksenip erseqqissaatigaa.

AAMMA ATUARUK Siumut: Nunatsinni coronamut illersuiniarluta taamaatitsivugut

- Tassa ullut qaninnerpaat piareerniartussaassapput, ataatsimeersuangajalerpugummi, Evelyn Frederiksen oqarpoq.

Siumup ukioq manna ataatsimeersuarnissaa coronavirusi peqqutigalugu aappassaanik kinguartinneqareerluni maanna pingajussaanik ullulerneqarpoq.

Nuna tamakkerlugu ataatsimeersuarneq juulip ulluisa arfineq-pingajuannit qulinganut ingerlanneqartussaanikuugaluarpoq taamaatinneqarlunili.

Ataatsimeersuarnissaq semtembarip ulluisa sisamaaniit tallimaanut ingerlanneqartussaagaluartoq aamma taamaatinneqarpoq, Angalaqqusinnginneq pillugu. 

AAMMA ATUARUK Erik Jensen: Siumup ataatsimeersuarnissaa kinguartinneqarpoq

- Tassa malittarisassat taakku aalajangiisuupput. Ataatsimeersuarnerit ukiut pingasukkaarlugit ingerlanneqartarput, uanili kinguartitsinermi kingullermi oqaatigivarput Siumup ataatsimeersuarnissaa ukioq manna ingerlanneqartussaasoq, Evelyn Frederiksen oqarpoq.

Ataatsimeersuarnissamilu siulittaasumik qinersisoqassaaq. Partiip siulittaasussaatut qinigassanngortinniarlutik nalunaareersut pingasut tassaapput, Kim Kielsen, Vivian Motzfeldt Erik Jensenilu.