Siumut: Aningaasaqarnerput ineriartortitsinerup aaqqissinnaavaa
Aningaasanut inatsisip aappaagumut atuuttussap amigartooruteqarlu akuersissutigineqarnerani aaqqissuusseqqinnerit aningaasarsiornerulernissamik siunniussaqartut amigaatigineqartutut, Aningaasaqarneq pillugu isumalioqatigiisitap siulittaasuat, Torben M. Andersenip taamatullu Grønlandsbankinip pisortaata, Martin Kviesgaardip isornartorsiutaat, Siumup politikkikkut oqaaseqartartuata, Jens-Erik Kirkegaardip maanna oqaaseqarfigai.
Aamma atuaruk Aningaasanut inatsisip isornartorsiorneqarneranut Demokraatit isumaqataapput
- Siumumiit oqaatigiuartarparput, siunissaq ungasissoq qaninnerlu eqqarsaatigalugit aaqqissuusseqqinnerit taama annertutigitillugit pisariaqarluinnartoq aamma aningaasarsiorfissanik nutaanik aallartitsisoqarnissaa.
- Tassami aaqqissuusseqqinnerit kisimiillutik Nunarput siumut aallartissinnaanngilaat, Nunatta aningaasaqarneranik ilisimasaqarluartut isornartorsiutaannut akissuteqarluni, Jens-Erik Kirkegaard siullermik taama oqarpoq.
Aaqqissuusseqqinnerit pitsaasut ingerlanneqarput
Naalakkersuisooqatigiilli aaqqissuusseqqinnernik pitsaasunik siunnersuuteqarsimasut Jens-Erik Kirkegaardip eqqaamaqquaa, tassa ilaatigut siusinaartumik pisartagaqarneq taamatullu utoqqalinersiat pillugit maanna taakku aaqqissuussiffigineqartussanngormata tamannalu Nunatta aningaasaqarneranut siunissaq ungasinnerusoq eqqarsaatigalugu iluarsiissutaajumaartut oqaatigalugu.
Taakkuli Nunatta aningaasaqarneranut annikitsunnguamik taamaallaat iluarsiissutaajumaartut, Aningaasaqarnermut siunnersuisooqatigiinnit nalilerneqarpoq.
Aamma atuaruk Amigartooqattaarneq IA-mit qatsunneqarpoq
Taamaakkaluartorli aningaasarsiorfissat allat suli isumalluutigineqartut, Jens-Erik Kirkegaard oqarpoq.
- Soorunami Nunatta aningaasatigut amigartooqattaarnera siunissaq ungasinnerusoq eqqarsaatigalugu attanneqaannarsinnaanngilaq.
- Taamaattumik inuussutissarsiutit nutaat aallartittariaqarput tassa aatsitassarsiorneruppat allaappataluunniit.
- Kisianni aamma mittarfissat nutaat sanaartorneqarnissaanni aningaasanik kaaviiaartitsinerit annertuumik iluaqusiisussaassapput, Jens-Erik Kirkegaard oqarpoq.
Ilaatigullu aamma eqqaamaqqullugu, mittarfiit siunissamik pitsanngorsarneqarneranni Nunatsinnut takornariaqarneq pitsaasoq aamma sunniukkumaartoq.
Sinneqartoornissaq anguniarneqarsimasariaqaraluarpoq
Grønlandsbankinip pisortaata, Martin Kviesgaardip aamma uggornarnerarpaa, Nunatta aningaasaqarnera maanna ajuissortorsuartut oqaatigineqarsinnaannginnera eqqrsaatigalugu, aningaasanut inatsit sinneqartooruteqartoq Naalakkersuisooqatigiinnit anguniarneqarsimanngimmat.
Aamma atuaruk Bankimi pisortaq: Sinneqartooruteqartariaqaraluarpoq
- Soorunami Nunatta aningaasatigut amigartooqattaarnera attanneqaannarsinnaangilaq. Tamannalu killeqartariaqarmat inuussutissarsiutit nutaat aallartittariaqarput, Kirkegaard oqarpoq.
Siumup politikkikkut oqaaseqartartuata, Jens-Erik Kirkegaardip taama oqarnermini ilaatigut eqqarsaatigaa inuussutissarsiutinik nutaanik pilersitsinermi napparsimmaveqarfiit, ilinniartitaaneq allallu Nunatsinni pisariaqartinneqartut aningaasalersorneqarnissaat pillugit Siumumit ilisimaarineqarlutik sulissutigineqassammata.
