Amigartooqattaarneq IA-mit qatsunneqarpoq
Aappaagumut inatsisip amigartooruteqarluni akuerineqarnerani ajornartorsiutit kinguartinneqaqattaarneqartut oqarluni, Aningaasaqarnermut siunnersortit siulittaasua, Torben M. Andersen sapaatip akunnerani kingullermi isornartorsiuivoq.
Siunissami ajornartorsiutaalerumaartussat pinngitsoortinniarlugit, Inuit Ataqatigiit aaqqissuusseqqinnissanik pisariaqartunik siunnersuuteqarsimagaluartut, Inatsisartunut ilaasortaq, Naaja Nathanielsen maanna oqarpoq.
- Nangeqattaartumik amigartooruteqartarnerit iluarinngilagut aamma aaqqissuusseqqinnerit suliassatut aallartinneqartussat takusariikkatsinnit pitsaanerusariaqarput. Inunnik isumaginninnerup, akileraartarnerup aamma ineqarnerup iluani aaqqissuusseqqinnerit pitsaanerusut sulissutigisariaqarpagut, isumaqarpugullu taakku nunatta aningaasaqarnera pitsaanngitsoq aaqqissinnaassagaat.
Apeqqummut Aningaasanut inatsisip isumaqatigiinniutigineqarnerani aaqqiissutissanik, Inuit Ataqatigiit sunik aaqqiissutissanik siunnersuuteqarsimasut, IA-p aningaasaqarnermut oqaaseqartartuat, Naaja Nathanielsen taama akivoq.
Aamma atuaruk Bankimi pisortaq: Sinneqartooruteqartariaqaraluarpoq
Aamma atuaruk Aningaasanut inatsit professorimit isornartorsiorneqarpoq
Nunarput ajornartorsiornerulersinnaalluarpoq
Siunissaq ungasinnerusoq eqqarsaatigalugu, aningaasanut inatsit amigartooruteqartumik inissinneqarnerani, Nunarput aningaasatigut ajornartorsiornerulersinnaalluartoq oqarlutik, Aningaasaqarnermut siunnersuisooqatigiit siulittaasuat, Torben M. Andersen aamma Nunatta aningaaserivissuata, Grønlandsbankenip piosrtaa, Martin Kviesgaard isornartorsiuipput.
Taakku isornartorsiuinerat, Naaja Nathanielsenip isumaqatigaa. Taannalu isumaqarpoq Nuatta karsiata amigartooruteqartartumik inissinneqaqattaarnera qaangerneqassappat aaqqissuusseqqinnerit piviusorsiornerusut aallartinneqartariaqartut. Naaja Nathanielsenili isumaqarpoq tamanna imaaliallaannaq iluatsinneqarsinnaanngitsoq.
- Imaanngilaq naalakkersuisuutitaqartut uangutsinnit ajornernik siunnersuuteqarmata oqarfigissagigut uangut pitsaanerusunik siunnersuuteqaraluartugut. Uangut siunniussarput tassaavoq, tassalu aningaasanut inatsimmut sunneeqataanissarput, Naaja Nathanielsen oqarpoq.
Aaqqissuusseqqinnerit qangali pisimassagaluarput
Taanna aamma oqarpoq, Inuit Ataqatigiit 2009-miit 2013 tikillugu naalakkersuisuutitaqarnerminni aaqqissuusseqqinnernik naammassisaqarsimasariaqaraluarlutik.
- Oqartariaqarpungali siumut ilisimareertariaqarsimagaluaratsigu aaqqissuusseqqinnerit pisariaqartut qangali aallartinneqareersimassariaqaraluarneri, tamakkuli suliarineqarneri sivisuumik ingerlasarput.
Inuit Ataqatigiit aningaasaqarneq pillugu oqaaseqartartuat, Naaja Nathanielsen taama oqarpoq.
Aningaasanut inatsisip aappaagumoortup amigartooruteqarluni isumaqatigiissutigineqartoq pillugu, naalakkersuisuutitaqartut aningaasaqarnermut oqaaseqartartuinik oqaaseqartitsiniarnerput radioaviisimit sulissutigileruttorparput.