Aningaasanut inatsit professorimit isornartorsiorneqarpoq

Namminersorlutik Oqartussat kommunillu piffissamut qaninnermut ingerlasinnaanissaannut aningaasanut inatsit qulakkeerivoq. Piffissamulli ungasinnermut ajornartorsiutinik aaqqiissutaanavianngitsoq, aningaasaqarnermut professori Torben M. Andersen naliliivoq
Assi © : Nauja Møller
novembarip 24-at 2015 14:05

Aningaasanut inatsisit ukiuni tulliuttuni amigartooruteqartussaavoq, taavali qinersisoqartussanngorpat ataatsimut isigalugu sinneqartooruteqarfiunissaa pilersaarutaalluni. Taamalu takuneqartareersoq Torben M. Andersenip erseqqissarpaa.

- Amigartooruteqariarluni siunissami oqimaaqatigiisitsinissamik neriuuteqartoqarluni aningaasanut inatsimmik maannatut suliaqartoqartartoq takusareerparput. Taamaaliornerli iluamik suli iluatsinnikuunngilaq, taamaammallu ajornartorsiutit aaqqinnagit siunissamut kinguartitsinertut oqaatigineqarsinnaavoq, Torben M. Andersen oqarpoq, ilanngullugulu erseqqissarlugu, utoqqalisussat amerliartussasut, taakkulu aningaasartuutaasussaassasut.

Aamma atuaruk Illoqarfinnut nutsertut amerlapput

 

Aaqqissuusseqqinnerit naammanngillat

Nunatta aningaasaqarnerata aaqqissuusseqqinnissamik pisariaqartitsinera sivisuumik oqallisaavoq.

Aaqqissuusseqqinnissallu Torben M. Andersenittaaq piffissami ungasinnermi aningaasaqarniarnermi pingaaruteqarluinnartut erseqqissarpaa, ilaatigullu utoqqalinersiaqarnermut tunngasunik aaqqissuusseqqittoqarniartoq nuannaarutigalugu.

Aamma atuaruk Aaqqissuusseqqinnerit nuanninngitsut ajornarneruleraluttuinnassapput

Aaqqissuusseqqinnissalli kisimiillutik Nunatta aningaasaqarniarnera aaqqinnavianngikkaat Torben M. Andersen isumaqarpoq.

- Aaqqissuusseqqinnerit ajornartorsiutit tamarmik aaqqinnavianngilai. Kalaallit Nunaanni aningaasaqarniarneq ataqatigiissappat, sulili ilungersornerulluni sulissuteqartoqarnissaa pisariaqarluinnarpoq, Torben M. Andersen oqarpoq, nangillunilu.

- Suliarisassat arlaqarput. Ilinniartitaanerup ataqatigiinnera, suliffeqarnermut politikki, isumaginninnikkut tapiissuteqartarnerup aaqqissuussaanera, pissutsillu allarpassuit suliffeqartitsiniarnermut inuussutissarsiorneruullu ineriartortinneqarnissaanut pingaaruteqartut. Aamma inussutissarsiornermi ineriartortitsinissamut suliniuteqartoqarnersoq apeqqutaavoq, Torben M. Andersen oqarpoq.

 

Inuussutissarsiornermut sunniuteqarpallaanngitsoq

Aappaagumulli aningaasanut inatsit inuussutissarsiornermut sunniuteqarpallaarnavianngitsoq, professori isumaqarpoq.

- Aningaasanut inatsit ataatsimut isigalugu inuussutissarsiornermut ineriartortitsinissamut sunniuteqarpallaarnavianngilaq. Ineriartortitsisoqassappat suli ilungersornerunissaq pisariaqarpoq, Torben M. Andersen oqarpoq.

Aamma atuaruk Nunatsinni ineriartortoqarnissaa Vittup takusinnaanerarpaa