Nunatsinni ineriartortoqarnissaa Vittup takusinnaanerarpaa

Aningaasanut Inatsit aappaagumoortoq, Naalakkersuisooqatigiinnit isumaqatigiissutigineqarluni ullumi atsiorneqarpoq.

Tamannalu aningaasaqarnermut naalakkersuisup, Vittus Qujaukitsup nuannaarutigaa.

- Siullermik nuannaarutigaara, aningaasanut inatsimmi inuussutissarsiutit inuiaqatigiit siuariartornissaannut suliniutit Naalakkersuisut aallartissimasaat annertusisamik taperserneqarmata, itassani takornariaqarnerup aalisarnerullu imminut akilersinnaanerusumik ilusilersorneqarnissaa ilaatigut oqariartuutaammat nuannaartuigaluguttaaq.

Vittus Qujaukitsup aamma nuannaarutiginerarpaa, suliffissaaleqisut aamma meeqqat inuuniarnermikkut ajornartorsiuteqartut ikiorserneqarnissaannik isumaqatigiittoqarnera.

Aamma atuaruk Aningaasanut inatsissap naammassineqarnissaa sulissutigineqaleruttorpoq

Aaqqissuusseqqinnerit siulliit aallartinneqartussanngorneri, naalakkersuisooqataasunit Demokraatinit nuannaarutigineqartoq, partiip aningaasaqarneq pillugu oqaaseqartartuata, Tillie Martinussenip nuannaarutiginerarpaa.

- Inunnik isumaginninnerup taamatullu peqqinnissaqarfiit pillugit aaqqissuusseqqinnerit nuannaarutigaagut, Tillie Martinussen oqarpoq.

Taassuma aamma nuannaarutiginerarpaa, isertitanut akileraarutip qaffanneqannginnissaanik isumaqatigiittoqarnera.

- Isertitanut akileraarutip qaffanneqannginnissaa Demokraatinit pingaartillugu aalajangiusimajuagarput nikisinneqanngimmat nuannaarutigaarputtaaq.

Tillie Martinussenip tamassumunnga ilanngullugu eqqaavaa, inuiaqatigiit inuussutissaqarnermut atuinermullu akiliisinnaassusaat ukiuni kingullerni qaffarialaarsimasoq eqqarsaatigalugu tamannalu siunissami suli pitsaanerulissappat, isertitanut akileraarut maannamiit qaffasinnerusariaqanngitsoq.

Tamarmili iluarinanngilaq

Illuatungaatigulli ingerlatsinermut sanaartornermullu aningaasartuutit amigartooruteqartumik inerneqarneri, Demokraatinit iluarineqavinngilaq, tamannali pinngitsoorneqarsinnaanngitsoq, Tillie Martinussen oqarpoq.

- Tassami meeqqat inuusuttuaqqallu pillugit suliniutinut aningaasaliinerunissaq pisariaqarluinnartutut isigaarput taamatullu inuti ajornartorsiuteqartut siusissukkut ikiorserneqartarnissaat pisariaqarluni soorlu atornerluisunik katsorsaanerit.

Dermokraatit aningaasaqarnermut oqaaseqartartuat, Tillie Martinussen taama oqarpoq.

Kujataani imeq atorlugu nukissiorfiup, Qorlortorsuup aningaasalersorneqarnera pissutaalluni ingerlatsinermut sanaartornermullu aningaasaliissutit amigartooruteqartumik inerneqarput.