Illoqarfinnut nutsertut amerlapput

Nutserneq, sulisinnaasut ikitsut utoqqartaqqortuneq aningaasaqarnermut unammillernarpoq. Arlaatigut iliuuseqartariaqartoq, Aningaasaqarneq pillugu Siunnersuisoqatigiit isumaqarput.
Assi © : Nauja Møller
septembarip 25-at 2015 05:02

Nunaqarfinniit illoqarfeeqqaniillu Nuummut nutsertut amerligaluttuinnarput.

Utoqqaat amerlanerujartortut, sulisinnaasut ikinnerujartortut og angutillu arnanit amerlanerusut avinngarusimasuni unammilligassanut ilaapput.

- Sumiiffiit inukilliartortut aningaasaqarniarnermut unammillernartuupput. Inuuniarnikkut nalimmassaasoqassapput sumiiffit taamattut aningaasalersuisoqartariaqarput. Aammali illuaniikkami, aningaasat arlaaaniit tiguneqartariaqarnerat. Qanorlu nalimmassaasoqassanersoq politikkerit aalajangigassaraat, Aniingaasaqarneq pillugu Siunnersuisoqatigiit siulittaasuat, Torben M. Andersen oqarpoq.

 

Najugaqarfiit inukilliartortut

Najugaqarfiit inukitsut, inunngortukitsut arnartakitsut utoqqartaqqortuut inueruteqqajaapput.

Najugaqarfiit tallimat inukilliartortut 2014-imi nalunaarsorneqartut, aningaasaqarnermut ilisimasallit Naalakkersuisunut nalunaarusiaminni allapput.

Najungaqarfiit inukilliartorneri Nunatsinniinnaanngitsoq ajornartorsiutaavoq. Tassami nunat avannarliit inuusuttamik illoqarfinnut pingaarnernut nussorneri ukiorpassuarni isiginnaarpaat.

Ajornartorsiullu inukinnerusut aningaasaliiffigineqarnerisigut ineriartortitsineq anguniarneqarsimavoq. Akitsuutit Sulisitsisut akilertagaat apparneqartarsimapput, nunat immikkortuini akileraarutit apparneqartarsimapput.

Taamaasiornerilli iluaqutaasimanngitsut, aningaasaqarneq pillugu siunnersuisoqatigiit siulittaasuata oqaluttuaraa.

- Iluatsinngillat, nutsertut unikaallatsinneqanngitsoorput.

 

Iliuuseqartoqartariaqarpoq

Politikkerillu iliuuseqartariaqarput:

- Nutsertut sanngiinnerusortaat eqqarsaatigalugit, inooqataanikkut ajornartorsiutaalersussanut sillimmartaarnissaq pingaartuuvoq. Tassalu kingunerusussat ajornerulersinnagit iliuuseqajaarnissaq pisariaqarpoq, Torben M. Andersen oqarpoq.