Aningaasanut inatsisip isornartorsiorneqarneranut Demokraatit isumaqataapput
- Uangut kisitta aalajangiisinnaasimagaluarutta aningaasanut inatsit 2016-moortoq sinneqartooruteqartumik inernilersimassagaluarparput.
Demokraatit sinnerlugit aningaasaqarnermut oqaaseqartartoq, Tillie Martinussen taama toqqaannartigisumik oqarpoq.
Taassuma parteeqataasalu aningaasanut inatsisip amigartooruteqartup, Inatsisartuni isumaqatigiinniutigineqarnerani amerlanerussuteqarlutik taasinermi tamanna akuersissutigaat.
Aamma atuaruk Bankimi pisortaq: Sinneqartooruteqartariaqaraluarpoq
Tillie Martinussenilli isertuutinngilaa, Grønlandsbankenip pisortaata, Martin Kviesgaardip Kalaallit Nunaata aningaasaqarniarnera pillugu, sapaatip akunnerani kingullermi isornartorsiuinera oqarluni, aningaasanut inatsit aappaagumoortoq sinneqartooruteqartumik inissinneqarsimasariaqaraluartoq, isumaqatigigamiuk.
Tillie Martinussenip aamma naqissuserpaa, aningaasanut inatsisip amigartooruteqarnera, Siumup Atassutillu aamma akisussaaffigimmassuk
Amigartoorneq enumanartuunngilaq
Naalakkersuisooqatigiinnut partiip allap ilaasortaasup, Atassutip, aningaasanut inatsisip amigartooruteqarnera ernumanartutut isiginngilaat. Partiip aningaasaqarnermut oqaaseqartartuata, Steen Lyngep pingaartuusoraa, Nunatta aningaasaqarnerata ilorraap tungaanut saatinneqarnissaa eqqarsaatigalugu, aningaasaliinissat ersissutigisariaqanngikkivut.
- Sanaartornernut aningaasaliinerit siunissami ingerlattariaqarpavut. Tamanna pissalluni suliffissaqartitsiniarneq akileraartarnikkullu isaatitsinerulernissarput siunertaralugu. Kisianni taamatut aningaasaliinerit siunertarissavaat siunissami aningaasartuutitta annikillisarnissaat, Steen Lynge oqarpoq.
Aamma atuaruk Aningaasanut inatsit professorimit isornartorsiorneqarpoq
Aaqqissuusseqqinnerit pisariaqarput
Aningaasanut inatsisip amigartooruteqarluni inissinneqarnera, aaqqissuusseqqinnissanik pisariaqartunik politikerit isumaqatigiissusiorsimannginnerannik tunngaveqarnerusoq, Aningaasaqarnermut siunnersuisooqatigiit siulittaasuannit, Torben M. Andersenimit aamma Grønlandsbankenip pisortaanit, Martin Kviesgaardimit isigineqarpoq.
- Taakku isumaqatigilluinnarpakka. Aaqqissuusseqqinnerit pisariaqartinneqartut ukiut qulit imaluunniit ukiut 15-nit matuma siorna aallartereerneqarsimasussaagaluarput, Tillie Martinussen oqarpoq.
Aaqqissuusseqqinnerit piffissaqarluassapput
Atassutilli aningaasaqarnermut oqaaseqartartua, Steen Lynge allatut isumaqarpoq. Taanna oqarpoq aaqqissuusseqqinnerit pitsaasut maanna aallartinneqareersut, taamaattorli aqqissuusseqqinnerni piffissaliunneqarsimasoq sivikinnerusinnaagaluartoq oqarluni.
- Kisianni tassa oqartariaqarpunga aaqqissueqqissaarnernik sulinerit sukkanerusumik pisinnaagaluarput. Taamatullu oqareerlunga erseqqissaatigissavara, utoqqalinersiat pillugit aaqqissueqqissaarnerit ullumi akuersissutigineqartussaapput. Tassalu tamanna suliatta ilagiinnarpaat, Atassutip aningaasaqarnermut tunngasunut oqaaseqartartua, Steen Lynge oqarpoq.
