Siumut: Akileraarummik appaaniarneq qineqqusaarutaavoq

Naalakkersuisut aappaagumut aningaasanut inatsisissatut siunnersuutaat Inatsisartut ullumi ataatsimiinneranni Siumumit isornartorsiorneqarpoq.

Inatsisissatut siunnersuummi isornartorsiorneqartut pingaarnerit marluupput, tassaappullu akileraarutip procentimik ataatsimik appartinneqarnissaanut siunnersuut, akitsuutillu assigiinngitsut aqqutigalugit tamassuma matussuserniarneqarnera:

- Sulinermik inuussutissarsiuteqartut eqqarsaatigigaanni, taakkua ullormut pisartagaannut qaffaassutissaq ullormut immaqa 2 - 3 koruuniuvoq. Taamaattumik takorlooruminaatseqaara patsisiliunneqartoq piviusorsiortuunersoq. Siumut tungaaninngaanniit oqarusuppunga taama uagut isiginngilarput. Una qineqqusaarutitut isigaarput, Siumup politikkikkut oqaaseqartartua Per Berthelsen oqarpoq.

Naak akileraartarnerup procentimik ataatsimik appartinneqarnissaanut Siumut tunngaviusumik isumaqataagaluartoq, tamanna aatsaat pisinnaassaaq akissaqalerutta, Per Berthelsen oqarpoq:

- Akileraarutit Nunatsinni malunnaatilimmik appartinneqarnissaat suleqataaffigerusullugu Siumumit erseqqissumik taavarput, kisianni tamanna aatsaat pisinnaavoq akissaqalerutta, Per Berthelsen oqarpoq.

Akileraarutip procentimik ataatsimik appartinneqarnissaanut siunnersuummi inuit assigiinngitsut assigiinngitsumik eqqorneqartussaanerannik oqalunneq Aningaasaqarnermut naalakkersuisup Maliina Abelsenip ilaatigut isumaqatigaa, akissarsiaqqortunerilli akileraarnerusalernissaannut taanna ammavoq:

- Isornartorsiuisut isornartorsiuinerminni ilaatigut oqaatigaat akissarsiaqqortunerit akileraarutip appartinneqarneratigut iluanaaruteqarnerpaajussasut, akissarsiaqqortunerilli akileraarnerusalernissaannut ammavunga, tamannalu oqallisigisinnaavarput, Aningaasaqarnermut naalakkersuisoq Maliina Abelsen oqarpoq, nangillunilu:

- Isornartorsiuisut apererusunnarput: Akissarsiaqqortunerimmi akileraarnerusalersikkutsigit? Periarfissalli massuma orniginartinngilaat, taava aperiinnarusuppunga: Akileraartarnermi taava qanoq aaqqissuussisoqassava? Maliina Abelsen aperivoq.

Kalaallit Danmarkimi ilinniagaqartut danskit ilinniagaqarnersiutaannut aappaagu januaarip aallaqqaataaniit nuunnerisigut 17 millionit koruunit ilaatigut sipaarutiginiarneqarnerat pillugu aaqqissuussiniarneq Siumup aamma upperinngilaa, ilinniartullu toqqissisimajunnaarnissaat oqaatigalugu:

- Ilinniagaqartut qisuariaatigivaat ernumallutik qallunaat nunaanni ilinniarnerminnut atatillugu aningaasanik tigusisalerunik, taava Nunatsinnut pituttorsimanertik misigissuseqarnertillu apparsarneqassasoq, matumanilu isumaqatigisinnaavakka. Siumumilli ernumassutigisarput tassaavoq soraarummeerluni angusatigut piumasaqaatit qallunaat nunaanni ilinniaqataasussat atugaattulli ilisissasoq, taamaalippallu iluatinnaqisumik Nunatta appasinnerugaluartumik angusaqarsimasut kalaallit inissaqartinneqartarnerup annaanissaa ernumassutigisupilussuuarput, Siumup politikkikkut oqaaseqartartua Per Berthelsen oqarpoq.

Maliina Abelsen tassunga atatillugu oqarpoq kalaallit Danmarkimi nunanilu allani ilinniartut nunatta karsianit aningaasalersorneqarnatik, naalagaaffimmiit aningaasarsiaqalissasut, ullumikkutullu aaqqissuussineq, tassa ilinniartut nunatsinneersut danskit ilinniarfiinut isersinnaassusaasa ajorseriannginnissaa matumani qulakkeerneqarumaartoq.