Siumup siulittaasortaavi: Ammanerulerlutalu oqaloqatigiinnerulissaagut
Erik Jensenip unammillertini Kim Kielsen Siumup siulittaasussaanik sapaatiummat qinersinermi uppisereeraalu, Siumukkormiut eqqissillutik juullisiorsinnaanngorput.
Siumumit Inatsisartuni ilaasortat ilarpassui Nuummiit angerlareerput, partiilli anguniagai nutaat piviusunngortinnissaat sulissutigileruttoritik, Siumup politikkikkut siulittaasuanut tullersortinngoqqammertoq Vivian Motzfeldt oqarpoq.
AAMMA ATUARUK Erik Jensen juullisioriartoq: Ukiortaareerpat aatsaat ataatsimeeqqissasut
- Inuiaqatigiinni naligiinnginnerup annertusiartuinnarneranut tunngatillugu aalajangersimasunik suliniuteqartoqarnissaa pisariaqartinneqarpoq. Kalaallisut oqaatsitta nukittorsarneqarnissaat inuiaqatigiinnilu kalaallisut oqaasillit periarfissaasa
annertusarneqarnissaat sammineqarput. Innuttaasut ataasiakkaat nukittorsarumallugit isumaginninnikkut sulineq annertunerusoq pisariaqartinneqarpoq, Vivian Motzfeldt siulittaasunngiornioqataasimasoq tusagassiuutinut nalunaarpoq.
Tamatuma saniatigut Illorsuit ammaqqinneqarnissaat, aalisarnerup siammasinnerusumik ingerlanneqarnissaa takornariaqarnermilu sumiiffiit akuutinneqarnerunissaat aamma sulissutigerusunnerarpaat.
Ammanerunissatta qulakkeernissaa pisussaaffigaarput
Partiip siuttui matoqqavallaarnerarlugit ataatsimeersuarnermi pingaarnertut oqallisigineqartut ilagaat. Partiimmi sutigut tamatigut peqataatitsinerunissaq ammanerunissarlu sulissutiginiarpai.
- Ammaneruneq oqaloqatigiinnerunerlu aqqutigalugit partiimi isummat assigiinngitsut
ataatsimoortinneqassapput. Ingerlalluarnissamut tamatta pisussaaffeqarpugut, Vivian Motzfeldt oqarpoq.
AAMMA ATUARUK Naalakkersuisooqataasut isumaqatigiissutertik attatiinnarusukkaat
Siumukkormiut siulittaasussamik qinersinissamut saqitsaatingaassiarsimasut, ataqatigiinneq partiip ilisarnaatigilerumaarneraa paasinarsiumaarpoq.
