Siumup qinigassanngortitaa innarluutillit atugaannik pitsanngorsaarusuppoq
Innarluutillit inuunertik naallugu ilinniarsimasunit sungiusarneqarnermikkut inuunerminni pitsaalluinnartunik angusaqarsinnaapput. Ilaatigut innarluutillit, inuusuttunngulernerminni ilikkarsinnaassutsimikkut qaffasinnerpaaffimminiittartut, ilinniarnissaannut periarfissanik pitsaanerusunik suliniuteqartoqarsimanngivippoq. Martha Lund Olsenip ilaatigut siunnersuutigaa innarluutillit ilinniarfissaannik højskolenik pilersitsisoqassasoq. Aamma nunatsinni innarluutillit najugaqartitaanerat pitsaaninngortinneqarsinnaavoq, tamannalu sukkanerpaamik pisariaqarpoq.
- Innarluutillit amerlanersaat ullumikkut ataatsimoorluni najugaqatigiiffinni ineqartinneqartarput, inissiallu tamakkua sisamanik tallimanilluunniit initaqartarmata, innarluutillit amerlanertigut 7 – 8 m²-inik angitigisuni, ataatsimut uffarfilimmi/anartarfilimmi, igaffilimmi isersimaartarfilimmilu inuunermik sivisunersaa najugaqartariaqartarput. Tamanna ataqqinassuseqartumik inuuneqarnerunngilaq, taamaammallu innuttaaqativut immikkut pisariaqartitsisut naligaluta inuuneqartutut taasinnaanngilagut, Martha Lund Olsen isumaqarpoq.
Martha Lund Olsenip aamma sivisuumik suliffissaaleqisut isornartorsiorpai. Amerlavallaartut siusinaartumik soraarnerussutisiaqaleriartortarput, inuunermilu sinnerani taamatut pisartagaqalersarlutik. Nunatsinni taamaaliuinnarsinnaanngilagut, aamma piffissaq qaninnerusoq ungasinnerusorlu eqqarsaatigalugit aningaasaqarnikkut isumatusaarnerunngilaq.
- Suliffissarsiuussisarfinni pitsaanerusumik sullissinikkut taakku piginnaasaannik naliliinerit aallaavigalugit, taakkulu ullumikkut suut aporfigineraat apeqqutaatillugit, immikkut piareersakkanik sulinermut piukkunnarsarneqassapput. Tamannalu nunarput tamakkerlugu piukkunnarsarfinnik sulinermullu sungiusarfinnik pilersitsinikkut iliuuseqarfigineqartariaqarput, tamannali siunissaq ungasinnerusoq isigalugu, inuunermik pitsaanngitsumik ingalatsiinnartut ikilisinnerisigut inuiaqatigiit aningaasaqarnerannut iluaqutaassaaq, Martha Lund Olsen nassuiaavoq.
