Ilisimasalik: Siumup Kim Kielsen ima uppitissinnaavaa
Siumut nutaamik siulittaasutaarusuppat, tusagassiuutinut nalunaarummi sakkortuumik isornartorsiuineq naammanngitsoq, Ilisimatusarfimmi inuiaqatigiilerinermi adjunkti Rasmus Leander Nielsen nassuiaavoq.
- Siullermik Inatsisartuni gruppimiittut taama amerlatigisut uuminnga nassiussinerat sakkortuumik oqaaseqaateqarneruvoq, Rasmus Leander Nielsen oqarpoq.
AAMMA ATUARUK Siumut Inatsisartuni ilaasortaatitat amerlanerussuteqartut Kim Kielsenip tunuarnissaanik piumasaqarput
Siumumeersut Inatsisartunut ilaasortat arfinillit naalakkersuisorlu Erik Jensen Kim Kielsenip Siumup siulittaasuatut tunuarnissaanik piumasaralugu ataasinngormat nalunaaruteqarput.
Allamilli siulittaasoqalissappat Siumumi immikkut ittumik ataatsimeersuartoqartariaqassaaq, Kim Kielsenimullu unammillertoq qinerneqartariaqassalluni, imaluunniit siulittaasoq tapersersorneqarunnaarnini pissutigalugu nammineerluni tunuarsinnaavoq.
- Kim Kielsenimut tunuarnissamik piumasaqaateqanngilaq, tunuarnissanili aalajangersinnaavaa. Tunuartissappassulli taava ingerlariaaseq malinneqassaaq Kimimullu unammillertumik siulittaasunngorniartoqassalluni, soorlu Vittus ukiut marluk matuma siorna taamaalisoq, Rasmus Leander Nielsen oqarpoq.
Siumumi ilaasortat nutaamik siulittaasumik qinersisinnaasut
Kim Kielsenilu nammineerluni tunuanngippat, partiillu siulittaasutut qinigassanngortitsiniarpat, immikkut ittumik ataatsimeersuarnermut aggersaassaaq, partiimullu ilaasortat siulittaasumut qinersissallutik.
AAMMA ATUARUK Kim Kielsen: Isornartorsiuinera tunngavissaqanngilaq
Nalinginnaasumik ataatsimeersuarnissap tullia aappaagu pisussatut pilersaarutaavoq.
Nutaamillu siulittaasoqalissappat, Kim Kielsen inatsisit naapertorlugit Naalakkersuisunut siulittaasuuginnarsinnaavoq, tamannali nalinginnaasuunngilaq.
Tatiginnikkunnaarnermik taasisoqarsinnaasoq
Periarfissaq alla tassaavoq, Siumup gruppiani ilaasortat naammaginninngitsut Inatsisartuni partiit allat ilagalugit Kim Kielsen Naalakkersuisut siulittaasuattut tunuartissinnaanerat.
Ukiakkut ataatsimiinnermi Kielsenimik tatiginnikkunnaarnermik taasillutik taamaaliorsinnaapput. Taamaattoqassappallu Kielsen Naalakkersuisut siulittaasuattut qinersinissamik nalunaaruteqarsinnaavoq.
Partiip siulittaasuanut isornartorsiut kimit atsiorneqarsimanersoq maannakkut soqutiginartoq, Rasmus Leander isumaqarpoq.
Atsiortut tassaapput: Anders Olsen, Nikkulaat Jeremiassen, Henrik Fleischer, Erik Jensen, Laura Táunâjik, Jens Danielsen Hermann Berthelsenilu.
- Kielsenimik tapersersuisut, soorlu Doris Jakobsen, atsioqataanngilaq. Aamma Vivian Motzfeldt atsioqataanngilaq, kisianni partiimi nuimasorujussuit atsioqataapput, tusatsiakkallu naapertorlugit taakkua ilaat partiimi siunissami siulittaasoorusupput, taavalu allat ilaaqqutinngillat. Ilaasortanili taama amerlatigisut atsioqataanerat soqutiginarpoq, taakkunanilu ilaat assersuutigalugu Erik Jensen partiimi nuimasupilussuupput, Rasmus Leander Nielsen oqarpoq.
Kim Kielsen danskit mittarfiliortiternerni aningaasaleeqataanissaat pillugu suliami erik Jensenimit siorna akerlilersorneqarpoq. Erik Jensenip Kim Kielsen isumaqatiginngikkaluarlugu siulittaasutut tapersersorlugu siorna oqaatigaa. Maannali tapersersorunnaarsimavaa.
