Kim Kielsen: Isornartorsiuinera tunngavissaqanngilaq
Kalaallit Airportsip Munck Gruppillu Københavnimi atsioqatigiinnissaat taamaatinneqassanngitsoq, Naalakkersuisut Siulittaasuata KNR-imut oqaatigaa.
- Isornartorsiuinera uanga isumanni tunngavissaqanngilaq, Naalakkersuisut siulittaasuat Kim Kielsen oqarpoq.
AAMMA ATUARUK Ataatsimiititaliami siulittaasup mittarfiit pillugit paasissutissinneqarnissaq piumasarigaa
Nuummi Ilulissanilu mittarfiliornissanut aqqusinniornissanullu sanaartornissamut qallunaat ingerlatseqatigiiffiat, Munck Gruppen A/S, toqqarneqarneqarnikuuvoq.
Kalaallit Airportillu ingerlatseqatigiiffik isumaqatigiissummik Københavnimi marlunngornermi aggustip 13-ani atsioqatigisussanngorpaa.
Kim: Paasissutissat tamaasa nalunngereerpaat
Mittarfiliornissamulli isumaqatigiissutip imarisaata aningaasaqarnermut akileraartarnermullu ataatsimiititaliamut paasissutissiissutigineqarnissaata tungaanut mittarfiliortiternissamut isumaqatigiissutip atsiorneqarnissaata kinguartinneqarnissaa, ataatsimiititaliap tallimanngormat piumasaraa.
AAMMA ATUARUK Aningaasaqarnermut ataatsimiititaliap mittarfiliortiternissamut isumaqatigiissut unitsikkusukkaa
Isumaqatigiissutip inuiaqatigiit aningaasaqarniarnerannut qanoq sunniuteqarsinnaanera ataatsimiititaliap paaseqqaarusuppaa.
Paasissutissalli tamaasa nalunngereeraat, Naalakkersuisut Siulittaasuata erseqqissaatigaa.
- Naalakkersuisut arlallit, tassa aningaasaqarnermut naalakkersuisoq, angallannermut naalakkersuisoq, uangalu ataasiarlunga aningaasaqarnermut ataatsimiititaliamiinnikuuvunga, taakkualu aningaasaqarnermut naalakkersuisup sassarfigalugit arlaleriarluni nassuiaattarnikuai.
Naalakkersuisut Siulittaasuannik naalakkeeqqunngilai
Mittarfiliortiternissallu pillugit sulinermi Inatsisartut sinaakkutigisaat malinneqartut, Naalakkersuisut Siulittaasuata oqaatigaa.
Taava aamma Naalakkersuisut Siulittaasuannik aggersaaginnarsinnaanngitsut, Kim Kielsen isornartorsiuivoq:
- Inatsisartut Naalakkersuisut siulittaasuat ima naalakkersinnanngilaat: "Qaagit, uani ataatsimiititaliami susassaqarfiginngisanni sassassuutit,", Naalakkersuisut Siulittaasuat, Kim Kielsen, oqarpoq.
Hermann Berthelsen nammineq sulivoq
Kalaallit Airportsip Munck Gruppillu pilersaarutaasoq malillugu atsioqatigiissanersut KNR-imit uppernarsartinniaraluarparput. Tamannali Kalaallit Airportsip attaveqaqatigiinnermullu naalakkersuisoqarfiup paasissutissiissutigiumanngilaat.
Hermann Berthelsen aningaasaqarnermut akileraartarnermullu ataatsimiititaliami Siumut ilaasortaatitaani pingasuusuni isumasioqatigiinnermi kisiartaalluni, aviisi Sermitsiaq.ag naapertorlugu, peqataasimavoq.
Isumasioqatigiinnerullu kingunerisaanik amerlanerussuteqartut Munck Gruppenimik atsioqateqarnissap taamaatinnissaanik piumasaraat.
Siumut ilaasortaatitaani peqataanngitsoq tassaavoq Siumut Inatsisartuni ilaasortaatitaasa siulittaasuat Karl Kristian Kruse.
Aningaasaqarnermut akileraartarnermullu ataatsimiititaliap nalunaarutaa Siumut ilaasortaatitaasa aatsaat pingasunngornermi ataatsimiinnerminni isummerfigissagaat, taassuma sermitsiaq.ag-mut oqaatigaa.
Kalaallit Airports Munck Gruppenilu tassani atsioreersimassapput.
