Siumup Inuit Ataqatigiit qaninniarfigai
Isornartorsiuinierit ikigisassaanngimmata Attaveqaqatigiinnermut Naalakkersuisup, Knud Kristiansenip, pingasunngornermi akunnermi apeqqarissaarneqarnissaa pissanganakumisaarsimagaluartoq apeqqarissaarneq uissuumminartorujussuartut taasassaanngilaq.
Illuatungiliuttunili ilaasortat siusinnerusukkut sakkortuumik isornartorsiuisimasut apeqqarissaarnermi peqataannginnerat maluginiarneqartariaqarpoq.
Tassami IA-p siulittaasuat, Sara Olsvig, siulittaasullu tullia, Aqqaluaq B. Egede akunnermi apeqqarissaarnermi najuutinngillat.
Naalakkersuisooqatigiinneq nutaaq
Kiffartuussinissamut isumaqatigiissutinut isornartorsiuingaatsiariarlutik apeqqarissaarneqarnerani sooq Inatsisartut ataatsimiittarfianni najuutinnginnersut paasisaqarfigisinnaasimanngilarput, Namminersorlutilli Oqartussani tusarfiit arlallit naapertorlugit, Siumumi naalakkersuisooqatigiinnik nutaamik pilersitsinissamut periarfissat misissorneqaleruttorput, maanilu Inuit Ataqatigiit pingaaruteqaratarsinnaavoq.
Ataatsimiinnerillu taakku najuutinnginnermut peqqutaasinnaanersut, KNR-imit uppernarsarsinnaasimanngilarput.
Naalakkersuisullu siulilttaasuat Kim Kielsenip IA-p najuutinnginneranut ataatsimeeqatiginninnermik peqquteqarnersoq oqaaseqarfigerusunngilaa, imali KNR-imut oqarpoq:
- Naalakkersuisooqatigiinneq nalilersorneqarpoq.
Kiffartuussinissamut isumaqatigiissutit septembarip qaammataani saqqummiunneqarmatali IA-p politikkikkut sulissutigisimasaanni anginerit ilagigaluarpaat.
