Siumup immikkoortortaqarfii: Coronamut maleruagassat paasisinnaanngilagut

- Suna tunngavigalugu sukaterinerit ingerlanneqartariaqalersimaneranik pisortat paasissutissiinerat iluamik nassuiarneqaranilu itisilerneqanngilaq, Siumut Nuummi siulittaasoq, Inga Dora G. Markussen oqarpoq.

Kattuffiit, peqatigiiffiit suliniaqatigiiffiillu naammagisimaarinninngitsut KNR-imit sapaatit akunnerini kingullerni marlunngulersuni oqaluttuaraagut.

Inuit aaqqissuussanut peqataanissamut nalunaarfigeriikkanut kommunit akimorlugit naapeqqusaanngillat, taaamaakkaluartoq Siumut nuna tamakkerlugu ataatsimeersuassaaq. Tamannalu amerlasuut eqqumiigaat.

AAMMA ATUARUK Corona pillugu malittarisassat paatsuungassutigineqartut: Allat aamma ersarissaaqqusisut

Siumup immikkoortortaqarfiini aamma paasiuminaatitsipput.

- Siumup ataatsimeersuarnissaanik ingerlatsisoqartoq kattuffiillu allat matoqqatinneqartut suna tamatumunnga nassuiaatissaanersoq paasinngilara, Siumup Ilulissani immikkoortortaqarfiani siulittaasoq, Jørgen Kristensen oqarpoq.

Taanna paasinninngittuni kisimiinngilaq, Siumut Paamiuni aamma taamannak misigipput.

- Uagut aamma nammineerluta Siumup iluani oqallisigivarput qanoruku paasisariallit. Pitsaasumik malittarisassaqartuuppat illuatungiliuttuulluni illersuisuulluniluunniit tamatta assortuunnata sulinerput ingerlassagaluarpoq, Thiiooq Knudsen oqarpoq.

Immikkoortortaqarfiit allat pingasut Tasiilameersut, Narsameersut Qaqortumeersullu KNR-p oqaloqatigisai aamma maleruaqqusanut paatsuungapput.

Inuiaqatigiit paatsuunganerat aningussagaanni pisortat erseqqarinnersumik tunngavilersuinerullutillu saqqummertarnissaat Siumut Nuummiit kaammattuuipput.

- Tunngavilersuisinnaasariaqarput sooq taamaaliornerlutik, tamannalu inuiaqatigiinnut iluamik paasitinneqarsimanngilaq, taamaammat uggornarpoq, isumaqarpungalu akulikinnerusumik paasititsiniaasoqartassagaluartoq, Inga Dora G. Markussen oqarpoq.

Kielsen ilannguppoq

Naalakkersuisut siulittaasuat Kim Kielsen isornartorsiutinut paasinnippoq.

- Nassuiaanerput pitsaanerusimasinnaagaluarpoq. Taamaammat pisortannut piumasarinikuuara taakkua saqqummiunneqartariaqartut, naatsorsuutigineqassoorlu sapaatit akunnerata tulliani taanna apuunneqarumaartoq, Kim Kielsen oqarpoq.