Siumummi qineqqusaartoq: Meeqqat bilitsiinut killigititaasoq qaffanneqarli
- Meeraq aqqaneq marlunnik ukioqalersimatillugu inersimasutut akiliisarnera, taanna qaffanneqassasoq. Soorlu assersuutigalugu 16-nik ukioqaleruni aatsaat inersimasutut akiliisalernissaa eqqarsaatigalugu, taama oqarpoq Lars Jørgen Kleist, isumaqarporlu killigititaq qaffanneratigut ilaqutariit akissakinnerit periarfissinneqassasut angalanerulernissamut.
Timmisartuussileqatigiiffiulli Air Greenlandip isumassarsiaq ammaffigaat, aningaasartuutaasussanut matussusiinissamut akiliisoqarumassappat.
- Sunaluunniit periarfissaavoq akilerumaneqarpat. Akinik appaaniarutta aningaasartuuteqassaagut. Tuniniaanerullu tungaatigut sinaakkutaqarnitsinni taamaaliornissaq pilersaarutiginngilarput, Air Greenlandimi tuniaanermut pisortaq Christian Kjeldsen taama oqarpoq.
Lars Jørgen Kleistillu tunngaviginerarpai nunat sanilerisatta meeqqanut akigititaasut siammasinnerusut periarfissaareernerat.
- Canadami 16-nik ukioqalersimatillugu aatsaat inersimasutut akiliisalertarpoq, aamma USA-mi American Airlines aatsaat 16-nik ukioqaleraangata akiliisalertarput, Lars Jørgen Kleist oqarpoq.
Radioaviisimiilli missuinitsinni paasivarput, amerikami canadamilu maleruakkat nunatsinniittut assigigaat, taamaattumik Lars Jørgen Kleistip oqaatigisai tunngavissaqanngitsut.
Taamaakkaluartoq nunatta iluani timmisartuussinermik ingerlatsisutuaasut maleruagassaasut puigorlugit siunnersuut suliarisinnaaneraat aperineqaramik ima akipput:
- Tamanna milliuunilikkaanik akeqassaaq, Air Greenlandimi tuniaanermut pisortaq Christian Kjeldsen oqarpoq.
Nunattalu karsianut aningaasarpassuarnik akeqaraluarpat Lars Jørgen Kleistip angujumavaa.
- Ilaqutariit nunatsinni akissaatikinnerusut, aammalu ukua akissarsiakkaanngitsut, nunatsinni angalasinnaanissaat periarfissikkumallugit, Lars Jørgen Kleistilli tunngavigisaa ataasiinnaanngilaq.
- Avinngarusimasuni aammalu timmisartuussinermi sinerissami, takujuartarparput timmisartut timmisartut issiavii inoqanngitsorpassuit, Lars Jørgen Kleist oqarpoq.
Siunnersuuteqartup tamanna naammaginanngitsutut isigaa, innuttaasulli illoqarfinnut ilaquttaminnut tikeraartalernissaannut atugassarititaasut pitsanngorsarusuppai.
Timmisartuutileqatigiiffiulli matoqqaffiginngilaa.
- Iliuuseqarniaraanni pilersaarusiortoqartariaqarpoq. Tuniniaasullu aningaasanik tunillugit, Christian Keldsen oqarpoq.
Timmisartullu ilaasukittut aningaasanik aallerfiusinnaasorai:
- Taakkulu isumaqarpunga immerneqarpata, isumaqarpunga Air Greenlandip sinneqartoorutai immerneqarsinnaasut, Lars Jørgen Kleist siumut sinnerlugu qineqqusaartoq taama oqarpoq.
