Siumumi nipaannersuaq
Kim Kielsen siulittaasuuinnassava?
Apeqqut taanna Siumup siulersuisuunerisa nuna tamakkerlugu immikkoortortaqarfimminnut apeqqutigaat. Immikkoortoqarfiit kingusinnerpaamik tallimanngornermi unnuap qeqqanut akeriissapput.
Akissutit partiimi siulersuisuunerit ataasinngornermi misissussavaat.
Siumup immikkoortortaqarfii siulittaasortik pillugu assigiinngitsunik isummersorput.
Nutaamik siulittaasortaarusuttut ilagaat Siumup Kangerlussuarmi immikkoortortaqarfia.
- Isumaqarpunga nutaat aammalu nukittunerusumik nutaamillu eqqarsartariaasilimmik qinigassaqartitsisoqassappat immaqa pitsaanerpaajussasoq, Kangerlussuarmi immikkoortortaqarfimmi siulittaasoq Knud Olsen oqarpoq.
AAMMA ATUARUK Immikkoortortaqarfiit Kim Kielsen siulittaasoriinnassanerlugu aalajangissavaat
Immikkut ittumik ataatsimeersuartoqaqqaartariaqarpoq
Kim Kielsen siulittaasuujunnaassappat immikkut ittumik ataatsimeersuartitsinissaq pisariaqarpoq. Siulersuisuunerni amerlanerussuteqartut imaluunniit immikkoortortaqarfiit affaanit amerlanerit taama kissaateqarsinnaapput.
- Imaalitsiaannaq taamatut angusaqartoqarsinnaanngilaq, Siumup allattaanera Mikael Petersen oqarpoq. Siumup siulittaasua taarserneqarpat qinersinissaq qanittuaranngussasoq taanna naliliivoq.
Immikkoortortaqarfiit sianerfigisatta ilaannaat KNR-imik oqaloqateqarusupput. Apeqqut Maniitsumi suli akineqanngilaq, Kujataani immikkoortortaqarfiit akissuteqaatitik saqqummiukkumanngilaat. Sisimiuni aamma taamak.
Kangerlussuarmiulli nutaamik siulittaasortaarusunnertik nalornissutiginngilaat.
- Siulittaasoqassagutta allatuulli saqqumilaartariaqaraluarpoq taamaattumik uagut tamaani Kangerlussuarmi oqaatigisinnaavarput tunuarsimavallaarnera nipaqanngippallaarnera ajuusaarutigisimagatsigu, siulittaasoq Knud Olsen oqarpoq.
Siumumi perulluliorneq
Siumup Inatsisartuni ilaasortaatitaani quliusunit arfinillit Kim Kielsen siulittaasutut allagaqarlutik tunuaqquaat, Naalakkersuisoq Erik Jensenip atsioqataaffigisaanik.
Inatsisartut aningaasaqarnermut akileraartarnermullu ataatsimiititaliap siulittaasuanit Hermann Berthelsenimit, kiisalu inatsisartunit ilaasortanit Anders Olsenimit, Nikkulaat Jerimiassenimit, Henrik Fleischerimit, Laura Taunajimmit kiisalu Jens Danielsenimit atsiorneqarpoq.
Kim Kielsenip Siumup qineqqusaarutai politikkialu malinngikkai ilaatigut isornartorsiutigineqarpoq. Tassani aalisagartassiissutit qilalugartassallu pineqarlutik.
