Immikkoortortaqarfiit Kim Kielsen siulittaasoriinnassanerlugu aalajangissavaat
Partiip Siumup sineriammi immikkoortortaqarfiisa siulittaasuminnut tapersersuinerlutik isummernissannut piffissaq qalliartorpoq, unnuap qeqqata tungaanut periarfissaqaramik.
Partiimmi immikkoortortaqarfini immikkut ittumik ataatsimeersuartitsisoqassanersoq isummeqquai, taakkulu isummersuutaat pillugit ataasinngorpat Siumup siulersuisuuneri ataatsimiissapput.
Tamanna pivoq Siumumeersut Inatsisartunut ilaasortat arfinillit naalakkersuisorlu Erik Jensen Kim Kielsenip Siumup siulittaasuatut tunuarnissaa sapaatip akunneri marluk matuma siorna piumasaqareersullu.
Kim Kielsenilli siulittaasutut tunuarniarani oqaatigereerpaa.
Immikkoortortaqarfiit aaliangiisussaasut
Siulersuisuunerni amerlanerussuteqartut piumasaqarpata, partii immikkut ittumik ataatsimeersuartussaavoq. Aamma immikkoortortaqarfiit amerlanerussuteqartut piumasaqarpata tamanna tusaaneqartussaavoq.
Immikkut ataatsimeersuarnermi siulittaasumik nutaamik toqqaasoqarsinnaavoq.
AAMMA ATUARUK Siulersuisuunerit Kim Kielsen siulittaasutut tapersersorpaat
Siumup siulersuisuunerisa siulittaasortik Kim Kielsen tunuliaqutserlugu nalunaarutigereerpaat, maannalu tassa immikkoortortaqarfiit isumasiorneqaleruttorlutik.
Siumup Inatsisartuni ilaasortaatitaani quliusunit arfinillit Kim Kielsen siulittaasutut allagaqarlutik tunuaqquaat, Naalakkersuisoq Erik Jensenip atsioqataaffigisaanik.
Inatsisartut aningaasaqarnermut akileraartarnermullu ataatsimiititaliap siulittaasuanit Hermann Berthelsenimit, kiisalu inatsisartunit ilaasortanit Anders Olsenimit, Nikkulaat Jerimiassenimit, Henrik Fleischerimit, Laura Taunajimmit kiisalu Jens Danielsenimit atsiorneqarpoq.
Kim Kielsenip Siumup qineqqusaarutai politikkialu malinngikkai ilaatigut isornartorsiutigineqarpoq. Tassani aalisagartassiissutit qilalugartassallu pineqarlutik.