Siumukkut akerliunerat Maliinap ajuusaarutigaa

 Tassa siunnersuutit 99 procentii Siumukkunnit isumaqatigineqaraluarmata. Procentit taama amerlatiginersut aamma assortuussutaarallarujut.

Aningaasanut Inatsimmut siunnersuutinut Siumut ukiut pingajussaannik isumaqataanatik aqagu taasissapput, tassalu taamaalilluni Naalakkersuisooqatigiit amerlanerussuteqalaarlutik Inatsimmut akuersisussanngorlutik.

Aningaasaqarnermut Naalakkersuisoq tamanna pillugu ima qisuariarpoq:

- Isumaliutissiissummi allassimagaluarpoqAningaasanut inatsissamut siunnersuutit 99 procentii Siumumit isumaqatigineqaraluartut, taamaattumik siunnersuutinut akuersiumannginnerat ajuusaarnarpoq.

Maliina Abelsenip qisuariaataanut Siumup siulittaasuata, Aleqa Hammondip isummani imaattoq annippaa:

- Siullermik oqaatigissavara Aningaasanut Inatsisip 99 procentia Siumumit isumaqatigineqanngitsoq Maliina Abelsenip oqaatigisaa ilumuunngimmat. Siullertut Aningaasanut Inatsit allanik qulequtaqanngilaq aasiit akitsuutinik, tamakkulu tassa inuiaqatigiit akissaqanngeqisut suli artukkerlugit iliornerummat. Tamannalu Siumup akuersaanngilaa, Aleqa Hammond oqarpoq.

Aappaattut pingajuattullu tunngavilersuilluni Aleqa Hammond ima oqarpoq.

- Kommunerujussuit aningaasatigut maanna ajornartorsiuteqareersut pillugit Naalakkersuisut pitsaanerusumik siunnerfeqanngillat aamma Naalakkersuisut tikkuussinngillat aningaasanik nutaanik Nunatta Karsianut isertitsissutaasinnaasunik. Tassalu Siumup kisiartaalluni aningaasanik isertitsissutaasinnaasunik siunnersuuteqartuuvoq. Siunnersuutigullu akuersaarneqarsimasuugaluarpata inuiaqatigiit akornanni aningaasanik aallernissamik pinngitsoortitsisimasinnaagaluarpoq, Aleqa Hammond oqarpoq.

Aningaasanut Inatsimmut 2012-imut akuersiniarlutik Siumut upernaaq nalunaaraluarput. Sapaatilli akunnera kingulleq aallartitsiartoq inatsisissamut taaseqataanissaat avanerujussuanngorpoq. Tamassumunnga pissutaaneruvoq Siumukkut siunnersuuteqarmata aatsitassarsioqatigiiffissuit Nunatsinni aallartinniartut 10 procentimik akitsuuserneratigut Nunatta Karsianut iluaqutissiisinnaagaluarmata.

Tamanna pillugu Aningaasaqarnermut Naalakkersuisoq, Maliina Abelesen ima oqarpoq.

- Allannguutissatut siunnersuutaat qimerlooreerlugit Siumukkut paasitinniaraluarpagut taakku atorsinnaanatigit. Tassami aningaasanik isertitsissutissatut siunnersuutaat 10 procenti, tassa 332 millionit koruuninik aallerfigineqarsinnaasut tunngavissaqanngilluinnarput, taamaattumilluuna allannguutissatut siunnersuutaannut tamanut isumaqataanngitsugut, Maliina Abelsen oqarpoq.

Siumupsaiunnersuutai 13-iusut ilagaat, aatsitassarsiornissamut misissuinerit akitsuuserneqarnissaat. Siunnersuutit allat aqqanillit aatsitassarsiornermut akitsuutinit aningaasalersorneqarnissaat siunnersuutaalluni.

Taama siunnersuuteqarneq Aningaasaqarnermut Naalakkersuisumit ima oqaatigineqarpoq:

- Aningaasanut Inatsimmut isumaqataannginnerannut pissutaaginnarunartoq tassaavoq illuatungiliuttutut inissisimanertik takoqqusaarutigiinnarlugu pisut, tamanna allatut nalilersinnaanngilara, Maliina Abelsen oqarpoq.

Tamanna pillugu Siumup siulittaasua ima akivoq:

- Aatsitassaqanermut inatsit Qallunaat Nunaannit angerlaallugu maani akisussaaffigaarput nunamullu piginnittussanngoreerluta. Tamannalu Naalakkersuisunut pisussaaffiliivoq avataaniit tikinniartunut piumasaqaateqarnissamik. Nunatsinnik atuiniarpata Nunatta Karsianut akileeqataasariaqarput. Taamaattorli Naalakkersusut akissalissuarnit aningaasanik aallerusunngillat. Inuiaqatigiilli akissaarukkiartuinnartut allerfigerusunnerullugit. Tassa tamanna Siumumit peqataaffigerusunngisarput. Siumup siulittaasua, Aleqa Hammond oqarpoq.