Siulittaasut: Folketingimut ilaasortanngortussat anguniakkagut uniornagit oqalussapput
Nunatsinnit Folketingemut ilaasortat partiimik anguniagaat uniorlugit Folketingemi oqaluttannginnissaat qanoq qulakkeerneqassava?
Apeqqut taanna partiit siuttuisa ippassaq oqallitsinneqarneranni sammineqarpoq.
AAMMA ATUARUK Aaja Chemnitz Larsenip nunaqarfiit matorusukkai
Folketigemut Inuit Ataqatigiinnit qinersinerit kingulliit marluk ilaasortaq, Aaja Cheminitz, nunaqarfinnik matooraanissamik Folketingep oqaluttarfianit 2020-mi oqarpoq. Taama oqareersimatsiartoq partiimi siulittaasup, Múte B Egedep naqqippaa. Partiip tamanna politikkerinngikkaa Aaja Chemnitzillu taama oqarsimanini namminneq akisussaaffigissagaa siulittaasoq taamani oqarpoq.
Tassalu qinigaq siulittaasorlu imminnut assortuuttumik avammut nalunaarput.
Múte: Ilinniarfigaara
Tamanna partiip siulittaasuata misilittagakinnerminik ilaatigut peqquteqartoq nassuerutigaa.
- Partiimi siulittaasunngoqqammerlunga ilinniarfigilluarnikuagut aamma pissutsit taamaattut. Taammaamat taanna aallaavigalugu suleriaaseq massakkut ataqatigiissaarinermik sulineq pingaartumillu aamma naalakkersuinikkut siuttuunerup aallaavigisaanik ingerlatsivugut, Múte B. Egede oqarpoq. Taanna 2018-mi partiimut siulittaasunngorpoq.
Erik Jensenip takoqqaartarai
Siumukkormiulli allatut periuseqarput. Tassa Folketingemut partii sinnerlugu ilaasortap saqqummiussassai siulittaasup takoqqaartarnerarpai.
- Uannut nassiunneqartarput oqariartuutissat imarisinnaasaat, qanoq sumullu sammivilersinnaanissaat. Aamma allattoqarfitsinnut nassiunneqartarput taamaalilluta partiprogramitsinnut naapertuuttumik inuiaallu sinnerlugit oqariartornissaminik taamaalilluni qulakkeerinnittarpoq, Erik Jensen oqarpoq.
Malinnaaniartut
Folketingimut Demokraatit sinniisoqarnikuunngisaannarput. Qinigaatitaqassagunilli siulittaasuat ilaasortap saqqummiussaanut malinnaalluarniarpoq.
- Qinigaassagutta isertitassarput qanoq Folketingep oqaluttarfianiit oqalunnersoq pingaartittussaavarput, Jens-Frederik Nielsen oqarpoq.
AAMMA ATUARUK IA-p Aaja Chemnitz Larsen akerlilerpaa: Soorunami nunaqarfinnik matoorisoqassanngilaq
Partiit siuttuisa sinnerisa partiip anguniagaanut naapertuuttumik oqaluttarnissaq pillugu apeqqut ataasinngormat oqallitsinneqaramik tigussaasumik akinngilaat.