Siuleriiaattoqartariaaruttoq: Imerniartarfinnut isersinnaasut marloriaataat isersinnaalissasut
Imerniartarfinnut siuleriiaannerit unnuap qeqqanit atorunnaassapput.
Naalakkersuisummi ininut isersinnaasutut amerlassusiligaasa affaannaanit isertoqaqqusaanermut malittarisassap atorunnaarsinneqarnissaa aalajangerpaat.
Nunatsinnut aqqut decembarip ulluisa 30-anni matuneqarpoq.
Nunatsinnulli 600-t missaanniittut sapaatip akunneranut tikissinnaapput - taakkuli tamarmik corona pillugu allattoqarfimmit akuerineqaqqaartartussaallutik.
Timmisartukkut angallanneq nalinginnaasoq maajip ulluisa pingajuanni ammaqqippoq.
Timmisartumut ilaasut 600-t timmisartunut pingasunut 200-kkaarlugit agguarlugit sapaatip akunneranut tikissinnaalerseqqinneqarput.
Tikissinnaasut 600-nerat oqartussat misissornissaannut angumerisinnaasutut naliligaraat.
Angalasulli tamarmik tikinnerminnit ullut tallimassaanni suli misissorneqartassapput angerlarsimaannaqqaartassallutillu.
Malittarisassaq taanna nunatsinni coronamik tunillatsissimasoqalerneranili tassa ukiup ataatsip missaata matuma siorna atuutilersinneqarpoq.
Tamanna pisiniarfiit neriniartarfiillu iserniartunut tamanut matunik ammaassisinnaaleqqinnissaanik aamma isumaqarpoq. Aamma bussit issiaviusinnaasunit amerlanerusunit aamma ilaasoqarsinnaaleqqipput.
Killilersuinernik maanna qasukkaasoqaleruttorpoq. Silami katerinnissamut killilersuinerit apriilip ulluisa 19-ianni aamma atorunnaarsinneqarput. Ullup taassuma siornatigut inuit amerlanerpaamik 250-it kisimik silami katersuuteqqusaagaluarput – tamanna maanna killilersorneqanngilaq.
AAMMA ATUARUK Múte B. Egede: Inuit 75 procentii akiuussuserneqaqqaassapput
Nunatsinnut aqqut ataasinngormat aamma ammaamiarneqarpoq. Tassa nunatsinnukarniartut corona pillugu allattoqarfimmit akuersissuteqarfigineqaqqaaratik maanna tikissinnaalerput.
Nunattali ammavinneqarnissaa 18-ileereersimasut 75 procentiisa akiuussutissamik kapitereerneranni aatsaat pisinnaavoq. Naalakkersuisut siulittaasuata, Múte B. Egedep tamanna aggustimi septembarimiluunniit pisinnaassasoq naatsorsuutigaa.
AAMMA ATUARUK Nakorsaaneq ernumasoq: Kangerlussuarmi kapuisoqarnerani inuusuttut affaannaat akuersisut
Nunatsinnili akiuussutisserneqarnissamut akuersisut nikerangaatsiarsimapput.
Inuit akiuussuserneqarusunnissaannik qanoq qulakkeeriniarpisi?
- Akiuussutissaq aallaqqaammut neqeroorutigaarput, akiuussuserneqarsimanngitsunullu neqeroorutigiinnassavarput, Naalakkersuisut siulittaasuat, Múte B. Egede KNR-imut ippassaq oqarpoq.
Innuttaasut 50-ileereersimasut tamarmik juulip qiteqqunnerani neqeroorfigineqareersimanissaat Naalakkersuisut nalilerpaat.
