Sisoraaserluni ooqattaasarnermi OL: Aputiliaq anorilu ilungersuatitsisinnaapput
Beijingimi ikinneqarmat. Sisorarnermi unammersuarfissaq Zhangjiakou Beijingip avannamut kitaaniippoq nalunaaquttap akunneri arlallit biilinik ornittariaalluni.
- Nalunaaquttap akunneri arfineq pingasut ingerlareersut aatsaat utimut apuuttussaagaluarpugut. Taamaattumik sisorartarfimmiiginnarpunga tv-milu malinnaaginnarlunga, Ukaleq Slettemark piffissaq atorluarniarlugu sungiusarlunilu unamminissaminut nukissanik katersisimasoq oqarpoq.
OL-mut sinnattoq piviusunngulerpoq ataasinngorpat 15 kilometerimut unammisoqassammat.
- Pikkunaqaaq. Unamminerilli sioqqullugit pissangajuitsuuguvunga. Maaniillunili OL-qataasullu illoqarfiat pisuttuarfigillattaallugu nuanneqaaq, Ukaleq Slettemark oqaluttuarpoq.
20-nik issittoq
Silami timersuutit allat assigalugit sila apeqqutaassaaq ataasinngormat unammiffimmi ualikkut nalunaaqutaq tallimap missaani unamminerit aallartippata ullullu taamaasinerani 20-it ataallugit ississinnaavoq.
- Aput aputaasiaagami issilu pissutigalugit panerpoq. Pujaatsoornarpoq sakkortusinnaallunilu. Taamaattumik sisoraatit pujassaataasa eqqorluarnissaat pingaaruteqarpoq, Ukaleq Slettemark oqarpoq.
AAMMA ATUARUK Ukaleq OL-imut annguttoq, aqqaluaa cuppimi aajugaasoq
Nunarsuarmi kakkannerpaat maanna unammisussanngorpai OL-mut anngunniarlutik tamaviaarsimaqisut immaqalu aatsaat taama qasujaatsigileqqasut.
- Suliassakka pitsaasumik naammassisimagukkit pisinnaasakkalu tamakkerlugit atorsimassagukkit naammagisimaassavara, Ukaleq Slettemark inissinnissat eqqarsaatigalugit eqqoriaasinnaanngikkallartoq oqarpoq.
Qallunaat erfalasuannik malittarisassat
Qallunaat erfalasuat atorlugu unammieqartoqataavoq taamaattumillu atisani unammissutissamini danebrog kisiat nuisatissinnaallugu – taamaattorli:
- Unamminermi atisakka eqqarsaatigalugit erfalasortaqanngillat. Atisalli unammissutikka allat assigalugit kalaallit kakioriaasiannik allalersugaapput, Ukaleq Slettemark oqarpoq, neriunnerarporlu tullianik tallimanngorpat siulliit 60-it akornanniissinnaassalluni taamaasippat sapaammi malersuunnermi peqataasinnaassagami.
Ukaleq Slettemarkip unammineri tamarmik KNR-TV-mi aallakaatinneqassapput.