SISip siulittaasua tunuarpoq
Inatsisartut ukiaanerani ataatsimiinnerat aallartimmat, Aningaasaqarnermut Naalakkersuisoq, Maliina Abelsen aappaagumut aningaasanut inatsisissatut siunnersuut kalaallisut oqalulluni saqqummiivoq.
Tamatuma kingorna Facebookimi atuarneqarsinnaavoq, Kaalinnguaq Siegstadip Maliina Abelsenimut uparuaatai nikanarsaanertut taaneqarsinnaasut.
Siumup Inuusuttunut Suleqatigiiffiata, SIS-p siulersuisuunerisa taama uparuaaneq akuerisinnaanagu, tusagassiutinut ippassaq nalunaaruteqarput. Allapputtaaq siulittaasoq, Kaalinnguaq Siegstad nammineq tunuarniuteqarsimasoq.
- SIS-miit erseqqissaatigissavarput, oqaatsit inuiaqatigiinnik avissaartuutsitsinatik ataatsimoortitsinissaat pingaartutut isigigatsigu, Piitannguaq Møller allappoq naqissuserlugulu Maliina Abelsenitut ittut taperserluinnarlugit kajumissaagassaasut taakku kalaallit oqaasiinik ilinniarusussuseqarmata.
Kaalinnguaq Siegstad Sermitsiaq.ag-mi ippassaq issuarneqarpoq, politikerit kalaallit oqaasiinik atuiniarsarinerinut nammineq inuttut isummersuutini aalassatitseqisut peqqissimissutiginnginnamigit.