Sisimiut eqqaani aqqartartumik ingerlasoqarsimaneranut takussutissaqanngitsoq

Sisimiut eqqaani aqqartartumik ingerlasoqarsimaneranut takussutissaqanngilaq. Værnfælles Forsvarskommando kingullermik taama nalunaaruteqarpoq, tamannali itigartitsissutigivinngilaa.

Allattoq Anton Gundersen Lihn

novembarip 09-at 2018 12:04

Sisimiuni innuttaasut pingasut aqqartartuusinnaasumik pingasunngormat takusaqartut, illersornissamut sillimaniarnermullu politikkimut tunngasunik nittartakkatigut nutaarsiassiisartoq, olfi.dk allappoq.

Issittumi Sakkutooqarfiup Kalaallit Nunaannilu Politiit suliaq misissuiffigaat. Inunnik apersuisoqarpoq Issittumi Sakkutooqarfiullu timmisartoq umiarsuarlu atorlugit sumiiffik misissuiffigaa.

- Sisimiut eqqaani aqqartartumik umiarsuaqarsinnaaneranut takussutissaqarluanngilaq, Værnsfælles Forsvarskommandimi sakkutuut tusagassiisartuat, Torben Kjelsen KNR-imut oqarpoq.

AAMMA ATUARUK Sisimiut eqqaanni aqqartartuugunartumik takunnittoqartoq

Apersorneqartut ilaata Sisimiut eqqaani prammimik kalissimalluni oqaatigaa, taannalu takuneqartuusinnaavoq.

Takunnittut ilaat assiliisimavoq, Værnsfælles Forsvarskommandollu assimi takuneqartoq prammiunera KNR-imut uppernarsarpaa.

SIsimiut eqqaani prammiunngitsumik allamik peqarsinnaasimanera, Værnsfælles Forsvarskommandop itigartitsissutigivinnianngilaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.